Agar Kongress qarz olish chegarasini ko‘tarmasa, Qo‘shma Shtatlar avgust oyidayoq davlat qarzi bo‘yicha defoltga duch kelishi mumkin.
Bu haqda AQSH moliya vaziri Skott Bessentning qonun chiqaruvchi organ rahbarlariga yo‘llagan maktubida aytiladi.
Uning so‘zlariga ko‘ra, hukumatning naqd pul zaxiralari avgust oyida Kongress tanaffusga chiqqan vaqtda tugaydi. Shu sababli moliya vaziri qonunchilarni “AQSHning to‘liq ishonchi va kreditini saqlab qolish uchun” iyul oyi o‘rtalariga qadar qarz limitini oshirish yoki to‘xtatib turishga chaqirdi.
Aks holda, avgust oyigacha mamlakat 36,2 trillion dollardan oshgan qarzlarini to‘lash uchun mablag‘ yetishmay qolishi mumkin.
Aprel oyida AQSH moliya vaziri Skott Bessent Qo‘shma Shtatlar defoltga yaqinlashayotgani haqidagi da’volarni rad etgandi.
“Odamlar AQSHdagi vaziyat nazoratdan chiqib ketgan, AQSH defolt tomon ketmoqda, deb aytmoqda. Bu gaplar haqiqatga to‘g‘ri kelmaydi”, degandi vazir.
Tahlilchilar fikriga ko‘ra, AQSH hukumati qarzi bo‘yicha defolt iyul o‘rtalari va oktyabr oyi boshlari orasida sodir bo‘lishi mumkin. Kongress qarz limitini oshirish yoki to‘xtatib qo‘yish bo‘yicha chora ko‘rmasa, iyul oyi o‘rtalariga qadar AQSHda hisob-kitoblarni to‘lash uchun naqd pul yetishmay qolishi mumkin.
Izoh (0)