Toshkentda qo‘shnisiga qo‘l ko‘targan erkak ruhiy-asab kasalliklari shifoxonasiga joylashtirildi

Toshkent shahar IIBB Yashnobod tumanida qo‘shni ayolga kuch ishlatgan erkak videosi yuzasidan ma’lumot berdi.

Ijtimoiy tarmoqlarda erkak kishi ayol kishiga qo‘l ko‘targani aks etgan video tarqalib, turli muhokamalarga sabab bo‘ldi.

Qayd etilishicha, 1-iyun kuni taxminan soat 17:00 larda Yashnobod tumani Ohangrabo ko‘chasida joylashgan ko‘p qavatli uylarning birida ruhiy-asab kasalliklari dispanserida ro‘yxatda turuvchi 26 yoshli A.A. qo‘shnisi 1986-yilda tug‘ilgan N.X. va uning voyaga yetmagan farzandlari bilan o‘zaro tortishib qolgan. So‘ng A.A. fuqaro N.X. ni sochidan sudrab kuch ishlatgan.

Mazkur holat yuzasidan Yashnobod tumani IIO FMB tomonidan tergovga qadar tekshiruv o‘tkazilmoqda. Fuqaro A.A. ruhiy-asab kasalliklari shifoxonasiga joylashtirilgan. “Tekshiruv yakuni bo‘yicha qonuniy qaror qabul qilinishi taʼminlanadi”, — deyiladi xabarda.

Eslatib o‘tamiz, 2023-yilda Surxondaryoda qaynaka onasiga “yaxshi qaramagan” kelinini urib, jag‘ini sindirgandi. Shuningdek, Toshkentda 44 yoshli erkak uy talashib akasini o‘ldirib qo‘ygan edi.