Ijtimoiy tarmoqlarda “Qo‘yliq” bozorini to‘liq buzilish boshlangani haqida xabarlar tarqaldi. Toshkent shahar hokimligi savdo faoliyati to‘xtatilmaganini ma’lum qildi.
Qayd etilishicha, ilgari muqobil savdo joylarini tayyorlash zarurati tufayli to‘xtatilgan “Qo‘yliq” bozori hududining bir qismini reorganizatsiya qilish va obodonlashtirish ishlari qayta tiklandi.
“Hozirda bozor yanada tartibli holga keltirilgan — tadbirkorlar uchun joylar yaratildi va hududdagi ishlar faol davom etmoqda. Barcha ishlar bosqichma-bosqich amalga oshirilmoqda, shu bilan birga savdo faoliyati to‘xtatilmagan”, deyiladi hokimlik xabarida.
Poytaxt hokimligining bildirishicha, bozor yopilmayapti, balki uning faoliyati optimallashtirilmoqda — tartib o‘rnatish, sanitariya sharoitlarini yaxshilash, infratuzilmani yangilash va umumiy xavfsizlik darajasini oshirishga alohida e’tibor qaratilmoqda. Bundan tashqari, kelgusida joriy etiladigan raqamlashtirilgan tizim soliq to‘lovlarining shaffofligini ta’minlash imkoniyatini yaratadi. Bu esa o‘z navbatida, yashirin iqtisodiyotning bozordagi ta’sirini kamaytirishga yordam beradi.
“Afsuski, o‘zgarishlar boshlanishidan oldin bozor hududida ko‘plab muammolar to‘planib qolgan edi, bu haqda fuqarolarning murojaatlari ham guvohlik beradi. Ular orasida — jinoyatchilik xavfi, eskirgan kommunikatsiyalar sababli yuzaga kelgan mayda yong‘inlar, sanitariya me’yorlarining buzilishi, shuningdek, qulaylik va odamlar salomatligiga xavf soluvchi tartibsiz savdo holatlari mavjud edi”, deyiladi xabarda.
Hokimlik bunday holatlar e’tiborsiz qoldirilishi mumkin emasligini, shu sababli tizimli qaror qabul qilingani, bozor xalqaro va zamonaviy shahar standartlariga mos holga keltirilayotganini bildirdi. Xabarda aytilishicha, barcha ishlar yakunlangach, bu hudud tadbirkorlar hamda tashrif buyuruvchilar uchun yanada qulay, xavfsiz va shinam makonga aylanadi.
Toshkent shahar hokimligi matbuot xizmatining xabar qilishicha, “Yunusobod” bozori hududining bir qismida rekonstruksiya ishlari ham boshlangan. Asosiy maqsad — tadbirkorlar hamda bozor tashrif buyuruvchilari uchun qulaylik, tartib va xavfsizlikni oshirishdan iborat.
Avval ushbu hududda 180 ta avtomobil uchun to‘xtash joylari mavjud edi. Ishlar olib borilayotgan davrda Ahmad Donish ko‘chasi bo‘ylab, jumladan yo'l o'tkazgich ostida, 350 ga yaqin to‘xtash joyi tashkil etildi. Bu tashrif buyuruvchilar uchun bozorga kirish imkoniyatini saqlab qoladi.
Ilgari avtoturargohda avtomobillardan tartibsiz savdo amalga oshirilgan bo‘lib, bu tartib va o‘tish yo‘llariga salbiy ta’sir ko‘rsatgan. Endilikda bu holat tartibga solinmoqda — avtomobillardan savdo qilgan shaxslar 50 metr ichkariga, maxsus tashkil etilgan hududga ko‘chirilmoqda. Bu yerda ular savdo qilishi uchun yanada qulay va xavfsiz sharoitlar yaratilgan.
“Qo‘yliq” bozori haqida
Poytaxt hokimligi yo‘l infratuzilmasini yaxshilash, kommunikatsiya tarmoqlarini takomillashtirish va tirbandliklarning oldini olish maqsadida 2021-yil dekabrda “Qo‘yliq” bozori ko‘chirilishi haqida xabar bergan edi. Mazkur eʼlondan so‘ng bozor buzilishidan norozi odamlar ko‘chaga chiqqan, turli nizolar yuz bergandi. Toshkent shahar hokimligi rekonstruksiya davrida “Qo‘yliq”da ish olib borayotgan savdogarlarga 6,5 kilometr uzoqlikda joylashgan, yangi qurilgan Food City bozori yoki Tashkent Index’ga ko‘chishni tavsiya qilgandi. Muhokamalar avj olgach, hokimlik “Qo‘yliq” dehqon bozorining to‘liq hududi davlat va jamiyat ehtiyojlari uchun olib qo‘yilishi ko‘zda tutilmaganini maʼlum qilgandi.
Izoh (0)