Toshkent shahrida BMTning Oziq-ovqat va qishloq xo‘jaligi tashkiloti (FAO) va Aholishunoslik jamg‘armasi (UNFPA) tomonidan amalga oshirilayotgan “Qirg‘iziston va O‘zbekistonning chegaradosh hududlarida hamkorlik orqali umumiy farovonlik” loyihasi yakuniga etdi. Bu haqda “Daryo” muxbiri xabar bermoqda.
Loyiha 2022-yil iyun oyida boshlangan bo‘lib, BMT Bosh kotibining Tinchlik qurish jamg‘armasi tomonidan moliyalashtirilib, Farg‘ona vodiysi orqali o‘tuvchi chegaraning har ikki tomonida yaxshi qo‘shnichilik munosabatlarini mustahkamlashga qaratilgan. U Qirg‘izistonning Jalolobod va O‘sh viloyatlarini, shuningdek, O‘zbekistonning Namangan va Andijon viloyatlarini qamrab olgan.
Unda 700 nafardan ortiq kishining, 66 ta o‘z-o‘ziga yordam guruhlari (SHG) tashkil etilgan. Guruhlar rivojlantirishga 131 ming 872 dollar ajratilgan. Ushbu guruh ishtirokchilarining 90 foizi ayollardir.
Guruhlar 5-6 kishidan iborat bo‘lib, ishlab chiqarish mahsulotini o‘zaro kelishgan holda vazifalarni taqsimlab amalga oshiradi. Masalan, sut va sut mahsulotlari ishlab chiqaruvchi guruh a’zolari bir xonadonda yig‘ilib, biri mahalladan sut yig‘sa, biri uni qayta ishlaydi, yana biri esa mahsulotlarni qadoqlaydi. Daromad o‘zaro teng taqsimlanadi.
Mahsulot ishlab chiqarish texnikalarini sotib olish uchun loyiha doirasida pul ajratilgan. Koordinatorlar guruhlarda guruh bo‘lib ishlash bo‘yicha tushuntirish berib borgan.
Izoh (0)