Senat 28-may kuni qonunchilikka sotuvchilarning oldi-sotdi shartnomasida ko‘rsatilgan majburiyatlarni o‘z vaqtida bajarishga undaydigan normalarni belgilovchi qo‘shimcha kiritilishini ma’qulladi.
Ma’lum qilinishicha, 2024-yilda Raqobatni rivojlantirish va isteʼmolchilar huquqlarini himoya qilish qo‘mitasiga isteʼmolchilardan kelib tushgan 30 070 ta murojaatlarning 4 213 tasida sotuvchilar tomonidan tovarlar (avtomobil, maishiy texnika, tayyor ovqat, mebel va boshqalar)ni kelishilgan muddatlarda yetkazib berilmaganidan norozi bo‘lgan.
Bundan tashqari, birgina avtomobil oldi-sotdisi bo‘yicha shartnomalarda ko‘rsatilgan muddatlarga rioya etilishi tizimli ravishda o‘rganilganda 5 332 ta holatda sotuvchilar tomonidan avtomobillarni yetkazib berish muddatlari buzilishi aniqlangan.
Senatorlar ma’qullagan qonun bilan “Isteʼmolchilarning huquqlarini himoya qilish to‘g‘risida”gi qonunga sotuvchilarni oldi-sotdi shartnomasida ko‘rsatilgan majburiyatlarni o‘z vaqtida bajarishga undaydigan normalarni belgilovchi qo‘shimcha kiritilmoqda.
Qonun bilan oldi-sotdi shartnomasiga muvofiq sotuvchi shartnomada belgilangan muddatda tovarni isteʼmolchiga yetkazib bermagan taqdirda sotuvchi kechiktirilgan har bir vaqt birligi (shartnomada ko‘rsatilgan daqiqa, soat, kun) uchun majburiyatning bajarilmagan qismining 0,5 foizi miqdorida isteʼmolchiga penya to‘lashi, biroq bunda penyaning umumiy summasi topshirilmagan tovar bahosidan oshib ketmasligi kerakligi aniq belgilab qo‘yilmoqda.
Bunda penyani to‘lash shartnoma majburiyatlarini buzgan sotuvchi tovarlarni yetkazib berish muddatlarini kechiktirib yuborish, to‘liq yetkazib bermaslik oqibatida yetkazilgan zararni qoplashdan ozod etmasligi belgilanyapti. Bundan tashqari, sotuvchi tovarlarni iste’molchiga topshirishning kechikishi iste’molchining aybi bilan sodir bo‘lganini isbotlasa, penya to‘lashdan ozod etilishi ko‘zda tutilmoqda.
Ushbu qonun deputatlar tomonidan 2025-yil 21-yanvarda birinchi o‘qishda qabul qilingandi.
Senatda ma’qullangan qonun bilan, shuningdek, Maʼmuriy javobgarlik to‘g‘risidagi kodeksga energiya resurslarini oz miqdorda talon-toroj qilish hamda ichki ishlar organlari xodimining va Milliy gvardiya harbiy xizmatchisining (xodimining) qonuniy talablarini bajarmaslik bilan bog‘liq huquqbuzarliklar uchun jazo choralari kuchaytirilishini nazarda tutuvchi qo‘shimcha va o‘zgartirishlar kiritilmoqda.
Bundan tashqari, “Yod yetishmasligi kasalliklari profilaktikasi to‘g‘risida”gi qonunga mamlakatda faqat yodlangan osh tuzi ishlab chiqarilishini, olib kirilishini va realizatsiya qilinishini, oziq-ovqat mahsulotlarini ishlab chiqarishda yodlangan tuzdan majburiy tarzda foydalanilishini, shuningdek, Sog‘liqni saqlash vazirligining osh tuzini hamda oziq-ovqat mahsulotlarini yodlashga, yodlangan tuzning muomalasiga doir sanitariya qoidalari, normalari va gigiyena normativlarini belgilash sohasidagi vakolatlari aniqlashtirilishini nazarda tutuvchi o‘zgartirishlar kiritilmoqda.
Izoh (0)