Хонанда Феруза Каримова қўшиқ ижросида шеърдан рухсатсиз фойдалангани учун муаллифга 40 млн сўмдан зиёд тўлайдиган бўлди. Бу ҳақда Интеллектуал мулк департаменти хабар берди.
Маълум қилинишича, шоира М.Ахрарова ўзига тегишли бўлган “Дод дегим келяпти дастингдан” номли шеъри ижрочи Феруза Каримова томонидан “Дастингдан” номли қўшиғида рухсатсиз фойдаланилганидан норози бўлиб ижрочидан товон пули ва маънавий зарар ундириш бўйича судга даъво аризаси киритди.
Суднинг сўрови асосида Адлия вазирлигинг масъул ходимлари ушбу суд мажлисида мутахассис сифатида иштирок этиб, ҳолатга ҳуқуқий баҳо берди. Суд мажлиси давомида аниқланишича ижрочи Феруза Каримова “Дастингдан” номли қўшиғини ижро этишда ҳамда барчанинг эътиборига етказишда шоира М.Ахрарованинг “Дод дегим келяпти дастингдан” номли шеърига бўлган муаллифлик ҳуқуқларини бузган.
Суднинг тегишли қарорига мувофиқ, шоира фойдасига ижрочидан БҲМнинг 100 баробари яъни 37 500 000 сўм миқдорида товон пули ҳамда 5 000 000 сўм маънавий зарар ундирилиши белгиланди.
Маълумот учун, “Муаллифлик ҳуқуқи ва турдош ҳуқуқлар тўғрисида”ги қонунининг 65-моддасига асосан муаллиф ёки мутлақ ҳуқуқларнинг бошқа эгаси ҳуқуқбузардан зарар қопланиши ўрнига базавий ҳисоблаш миқдорининг йигирма бараваридан минг бараваригача миқдорда тўланиши лозим бўлган товонни тўлашини талаб қилишга ҳақли ҳисобланади.
Изоҳ (0)