Марказий банк 2025 йил фервалида мамлакат ялпи халқаро захиралари қиймати 2 млрд долларга кўпайганини маълум қилди. Бу олтин нархининг 2791,50 доллардан 2861,40 долларгача ўсгани билан изоҳланади.
2025 йил 1 март ҳолатига кўра, Ўзбекистон халқаро захиралари 44 млрд 943 млн доллардан ошди (1 февралда 42,9 млрд доллар бўлган). Шундан олтин қиймати 34 млрд 860 млн доллар, хорижий валютадаги захира активлар 9,5 млрд долларни ташкил этган.
Февраль ойи давомида халқаро захираларнинг олтин қолдиғи 10,7 тоннага камайиб, 345,8 тонна қолган. Яъни қимматбаҳо металлнинг физик ҳажми қисқарган, бироқ нарх ўсиши ҳисобига миқдор камайса-да, қиймат кескин пасаймаган.
Иқтисодчи Отабек Бакиров фаразига кўра, февралда Марказий банк йирик миқдорда олтин экспорт қилган бўлиши мумкин.
“Февраль ойи давомида халқаро захираларнинг олтин қолдиғи 380 минг унсияга қисқарган. Бу маҳаллий ишлаб чиқарувчилардан ой давомида сотиб олинган олтин ва рекорд нархлар ҳам ҳисобга олинса, четга 700–750 минг унсия ёки қийматда камида 2,1-2,3 млрд долларлик олтин сотилганини англатади. Пандемиядан кейин бир ой ичида бундан кўпроқ қийматда олтин сотилмаган (2020 йил августда 2,5 млрд долларлик олтин сотилган). Айнан рекорд даражада олтин сотилгани ҳисобига захираларнинг валюта қисми 2,2 млрд доллардан кўпга ўсиб, 9,5 млрд доллардан ошган. Хусусан, қимматли қоғозлар қолдиғи 100,4 млн долларга кўпайиб, 202,5 млн долларни ташкил этган”, — дея фикр билдирган мутахассис.
Сўнги етти йилнинг март ойлари аввалида Ўзбекистон халқаро захиралари қиймати қуйидагича ўзгарган:
- 2018 йил — 28,3 млрд доллар;
- 2019 йил — 28,1 млрд доллар;
- 2020 йил — 30,5 млрд доллар;
- 2021 йил — 33,2 млрд доллар;
- 2022 йил — 35,3 млрд доллар;
- 2023 йил — 33,9 млрд доллар;
- 2024 йил — 32,2 млрд доллар
Марказий банк йирик миқдорда олтин сотиб келади. Шу боис, захирадаги олтинлар ҳажми жуда секин ўсмоқда. Масалан, 2018 йил 1 март ҳолатига мамлакат олтин захиралари қолдиғи 320 тонна эди. Орадан саккиз йил ўтиб, яъни 2025 йил мартида бу ҳажм 345,8 тоннага етган. Мамлакат 2022 йилда 4,1 млрд долларлик олтин экспорт қилган. 2023 йилда эса рекорд даражада кўп — 8,1 млрд долларлик, 2024 йилда эса 7,5 млрд долларлик олтин экспорт қилган. Жорий йил январь ойида Ўзбекистон дунёдаги энг йирик олтин харидори бўлган.
Изоҳ (0)