Олма сиркаси пазандачиликда, халқ табобатида ва баъзан косметологияда ишлатилади. Баъзилар ундан озиш учун фойдаланади, аммо диетолог мутахассис ушбу сиркани ичиш мутлақо мумкин эмаслигини маълум қилди.
Олма сиркаси ушбу мева шарбатининг ферментацияси жараёнида ишлаб чиқарилади. Унинг 95 фоизини сув, 5-6 фоизини сирка кислотаси ташкил этади. Сирка олмани майдалаш, шарбатини чиқариб, кейин бактериялар ва хамиртуруш қўшиш орқали тайёрланади.
Олма сиркаси билан боғлиқ янглиш фикрлар
Ҳозирда тармоқларда ушбу маҳсулотни ошқозон-ичак тракти, холестерин ошиши ва 2-тоифа қанд касаллиги каби муаммоларни даволашда ва профилактик чора сифатида қўллаш бўйича кўплаб тавсиялар мавжуд.
Диетолог ва гастроэнтеролог Яна Музирининг сўзларига кўра, баъзи тадқиқотлар олма сиркаси саломатликни яхшилашга ёрдам беришини тасдиқлайди. Олма сиркасини турли озиқ-овқат билан бирга истеъмол қилиш глюкоза даражасини бир оз пасайтириши мумкин. Аммо бу усул диабетнинг олдини олиш ёки назорат қилиш учун етарли эмас.
Баъзилар олма сиркасини жиғилдон қайнаши ва ошқозондаги кислота даражасининг ошиши — гипохлоргидрияни даволашда қўллайди. Бу восита умумий аҳволни бир оз яхшиласа-да, унинг самарадорлиги ҳақида ҳеч қандай илмий далил йўқ. Шу сабабли мазкур даволаш усулини уй шароитида қўллаш мумкин эмас.
Илгари сирка кислотаси ортиқча ёғлардан халос бўлиш ва иштаҳани оширувчи гормонларни камайтиришга ёрдам беради, деб ҳисобланган. Бу фикр хато бўлиб, уни исботлайдиган ва бирорта тадқиқот мавжуд эмас.
Олма сиркасининг зарарлари
Тиш эмалини емиради
Олма сиркаси таркибидаги кучли кислоталар тиш эмалига жиддий зарар етказади, сиркани сувга қўшмасдан ўз ҳолича ичиш эса оғиз бўшлиғи ва қизилўнгачнинг куйишига олиб келади. Умумий ножўя таъсирларга кўнгил айниши, қорин оғриши, жиғилдон қайнаши киради.
Гипокалемия
Агар организмда аввалдан калий етишмаслиги бўлса, олма сиркаси вазиятни янада ёмонлаштиради. Диуретиклар ва инсулин каби дорилар билан олма сиркаси ўзаро таъсирлашиб, соғлиққа зарар етказиши мумкин.
Шунингдек, буйрагида муаммоси бор шахслар олма сиркасини ичмасликлари керак. Бундай беморлар учун ортиқча миқдоридаги кислоталар ўта хавфли ҳисобланади.
Олма сиркасини турли маринадлар ва соусларни тайёрлаш учун асос сифатида қўллаш мумкин. Маҳсулот истеъмолидан сўнг умумий аҳвол ёмонлашса, шифокорга мурожаат қилиш зарур.
Изоҳ (0)