Швеция полицияси Стокгольм марказидаги меҳмонхонада жинсий зўравонлик бўйича шикоят келиб тушгач, тергов бошлади. Швеция ОАВининг хабарига кўра, гумонланувчи — “Реал” футболчиси Килиан Мбаппе.
Килиан Мбаппенинг ҳозирги мақоми — “асосли гумонланувчи”
Килианнинг Франция терма жамоаси ўйинлари вақтида Швецияга йўл олиши дарҳол машмашаларни келтириб чиқарган эди. Терма жамоа сардори ўйинни кўриш ўрнига, тунги клубга боришни танлаган. Бу эса турли танқидларга сабаб бўлганди.
Швециядан кейин Мбаппе Корсикада ҳам кўзга ташланган. Ушбу таътил Килиан учун анча муаммоларни келтириб чиқарди. Сўнгги 24 соат ичида “Реал” юздузи атрофида жинсий зўравонлик ва таъқиблар ҳақида шов-шувлар пайдо бўла бошлади.
12 октябрь куни Швеция маҳаллий полициясига жинсий зўравонлик бўйича шикоят келиб тушган.
Қайд этилишича, ҳодиса 10 октябрь куни Стокгольм марказида содир бўлган. Ҳуқуқ-тартибот идоралари ходимлари Мбаппе ва унинг ҳамроҳлари жойлашган меҳмонхонага етиб борган.
Гумонланувчилар ҳақида ҳеч нарса маълум эмас, прокуратура изоҳ беришдан бош тортган. Миш-мишларга қараганда, Мбаппе асосий гумонланувчи.
Килианнинг ўзи эса Twitter саҳифасида ушбу хабарни сохта дея атади: “Ёлғон хабар. Тингловдан бир кун олдин бўлиши тасодифдек”.
Футболчи “ПСЖ” билан боғлиқ муаммони назарда тутган. “ПСЖ”нинг Мбаппе олдидаги 55 миллион евролик қарзи бўйича апелляция шикояти тингланади. Парижликларнинг футболчи олдида маош ва бонуслар борасида қарздорлиги мавжуд эди.
Швеция прокуратураси Мбаппенинг исмини тилга олмаган ҳолда, жинсий зўравонлик бўйича дастлабки тергов ҳаракатлари бошланганини эълон қилди.
Швециянинг TV4 телеканалига кўра, жабрланувчи полицияга Мбаппе томонидан жинсий тажовузга учрагани ҳақида хабар берган. Айни дамда Мбаппега Швеция полицияси томонидан “асосли равишда гумонланувчи” мақоми берилган. Бу Швецияда шубҳаланишнинг энг паст даражаси ҳисобланади.
Изоҳ (0)