“Қишлоқ хўжалиги вазирлиги ҳузуридаги Агросаноатни ривожлантириш агентлиги фаолиятини ташкил этиш тўғрисида”ги президент қарори қабул қилинди.
Ҳужжат билан боғдорчилик, узумчилик, иссиқхона хўжалиги, қишлоқ хўжалиги маҳсулотларини сақлаш ва қайта ишлаш соҳасидаги ислоҳотларни чуқурлаштириш ҳамда тизим фаолиятини яхшилаш бўйича “йўл харитаси” тасдиқланди.
Шунингдек, 2024—2027 йилларда анжир, фундук (ўрмон ёнғоғи) ва зайтунзорларни ташкил этишнинг мақсадли кўрсаткичлари белгиланди.
Агентлик томонидан жамғарма маблағлари ҳисобидан молиялаштириладиган қишлоқ хўжалиги ва озиқ-овқат йўналишидаги субсидиялар турлари мақбуллаштирилади.
Бунда:
2025 йил 1 январдан:
- интенсив мевали боғ ва узумзорларда томчилатиб суғориш тизимлари ўрнатгани учун субсидия 1 гектар учун 16 миллион сўмдан ошмаган миқдорда белгиланади;
- сув тежовчи технологияларни қўллаш учун субсидия сув қувурларининг ўлчамидан (диаметри) келиб чиқиб, 40 минг сўмдан 250 минг сўмгача белгиланади;
- “ин-витро” усулида яратилган мевали пайвандтагли кўчатларни сотиб олиш харажатлари учун субсидия ушбу харажатларнинг 50 фоизи миқдорида белгиланади;
- экиш схемалари ҳудудларнинг тупроқ ва иқлим шароитларидан келиб чиқиб, Агентлик тавсияси билан белгиланади.
Кўчат пайвандтаглари учун бериладиган барча турдаги субсидиялар 2024 йил 1 октябрдан бекор қилинади. Ўзбекистонда пайвандтагларни сотиб олиш харажатларининг бир қисмини қоплаш учун субсидиялар 2021 йилдан буён берилаётган эди.
Изоҳ (0)