Америка Қўшма Штатлари олтинчи авлод Б-21 Раидер стратегик яширин бомбардимончи самолётининг мунтазам синов парвозларини бошлади.
Бу ҳақда Нортҳроп Грумман корпорацияси авиация тизимлари департаменти раҳбари Томас Жонс маълум қилди.
“Биз ҳақиқатан ҳам суръатни ошириб боряпмиз ва ҳафтада иккита синов парвозини амалга оширмоқдамиз”, деди Жонс Америка ҳаво кучлари ассоциацияси конференциясида.
Унинг сўзларига кўра, яқин келажакда ҳар куни синов парвозлари амалга оширилади.
Аввалроқ АҚШ Ҳарбий-ҳаво кучлари глобал зарба бериш қўмондонлиги стратегик бомбардимончи самолёт аллақачон кам ҳажмда ишлаб чиқарилаётгани ҳақида хабар берган эди.
Б-21 Раидерни ишлаб чиқариш дастури доирасида АҚШ Ҳарбий-ҳаво кучлари 2030 йиллар бошига қадар ушбу самолётлардан камида 40 тасига эга бўлади. Нортҳроп Грумман корпорацияси аллақачон ушбу турдаги камида ўнта самолётни тайёр қилиб бўлган.
2022 йил декабрь ойининг бошида Пентагон биринчи марта янги стратегик яширин бомбардимончи Б-21 Раидерни расман тақдим этганди.
Б-21 Раидер қандай хусусиятларга эга?
Дастлабки маълумотларга кўра, илғор технологиялар асосида яратилган Б-21 Раидер бомбардимон самолёти аввалги авлод самолётларига қараганда кўпроқ юкни кўтара олади.
Шунингдек, уни радарларда аниқлаш қийин бўлади. Б-21 Раидер оддий ўқ-дориларни ҳам, термоядро қуролларини ҳам олиб юришга қодир бўлади. Ишлаб чиқиш жараёнида бомбардимончи самолётнинг парвози давомийлигига алоҳида эътибор берилди, аммо тўлиқ хусусиятлари махфий сақланмоқда.
Изоҳ (0)