Охирги ойларда АҚШнинг Украинага ажратаётган ҳарбий ёрдам пакетлари Пентагон захиралари тугаши туфайли қисқарди, деб хабар бермоқда CNN икки манбага таяниб.
Ўтган ҳафта АҚШ Мудофаа вазирлиги матбуот котиби Патрик Райдер департаментда Украинага қурол узатиш дастури доирасида ёрдам бериш учун 5,9 миллиард доллар қолганини айтганди.
CNN таъкидлашича, Пентагонда Украинага етказиб беришга тайёр бўлган қуроллар йўқ.
“Ҳамма гап украиналиклар нимани сўраётгани ва бу сўровларни қаноатлантиришимиз учун имкониятимиз бор ёки йўқлигида”, дея ўз манбаларидан бирининг сўзларини келтиради телеканал.
“Сўнгги пайтларда Қўшма Штатлар нафақат ўз захираларини тўлдириш, балки Украинани таъминлаш учун ҳам қурол ишлаб чиқаришни сезиларли даражада оширди”, деб ёзади CNN.
Агар Россия—Украина ҳарбий можароси бошланишидан олдин Қўшма Штатлар ҳар ойда тахминан 15 минг 155 мм ли снаряд ишлаб чиқарган бўлса, ҳозир ишлаб чиқариш қуввати 40 минг снарядгача ошди. Бироқ Пентагон ойига 100 минг снаряд ишлаб чиқариш мақсадига ҳали эриша олмади.
CNN Пентагоннинг қурол ишлаб чиқариш мақсадларига эришиши учун бир неча йиллар керак бўлиши мумкинлигини тахмин қилмоқда. Айни дамда Конгрессда президентнинг қурол-яроғ етказиб бериш дастури доирасида ваколатларини кенгайтириш масаласи муҳокама қилинмоқда.
Агар президентнинг бу борадаги ваколати узайтирилмаса, Оқ уй 30 сентябрдан кейин қолган 5,9 миллиард долларнинг тасарруфини бошқара олмайди.
Изоҳ (0)