Европа футбол ассоциациялари иттифоқи (УЕФА) Англия терма жамоасини 2028 йилда ўз уйида бўлиб ўтадиган Европа чемпионатидан, шунингдек, инглиз клубларини Еврокубоклардан четлатиши мумкин. Бунга футболни назорат қилувчи орган ҳақидаги қонун лойиҳаси сабаб бўлмоқда.
Март ойида Буюк Британия ҳукумати янги назорат органи ҳақида қонун лойиҳасини тақдим этди. Бу орган бой клубларнинг алоҳида лигаларга қўшилишини олдини олиш ва клубларни молиявий хатолардан ҳимоя қилиш учун яратилади.
Манбага кўра, сентябрь ойида УЕФА бош котиби Теодор Теодоридис Буюк Британия маданият, ОАВ ва спорт вазири Лиза Нендига мактуб ёзиб, ҳукуматнинг футбол бошқарувига аралашувидан огоҳлантирган. Акс ҳолда инглиз клублари ва терма жамоалари УЕФА мусобақаларидан, жумладан, Европа чемпионати ва Чемпионлар Лигасидан четлатилиши мумкин. Қолаверса, УЕФА Европа саралаш ўйинларини ўтказаётгани учун Англия Жаҳон чемпионатига чиқишда муаммоларга дуч келади.
Ушбу мактуб 2 сентябрь куни юборилган, лекин ҳали Ненди томонидан жавоб олинмаган. УЕФА эса бу маълумотга изоҳ бермаган.
Изоҳ (0)