Июль ойида жиноят оламида “қонундаги ўғри — Бахти Ташкентский” номини олган 53 ёшли Бахтиёр Қудратуллаевга суд ҳукми билан 20 йил муддатга озодликдан маҳрум этиш жазоси тайинланган эди. Шунингдек, унинг ўғиллари — Ихтиёр Қудратуллаевга 9 йил, Бекзод Зафаровга 11 йил, акаси Шуҳрат Қудратуллаевга эса 10 йил 6 ойга озодликдан маҳрум қилиш жазоси берилди.
Тошкент шаҳар суди матбуот хизматининг “Дарё”га маълум қилишича, Тошкент шаҳар суди жиноят ишлари бўйича судлов ҳайъати апелляция инстанциясида жиноят ишлари бўйича Шайхонтоҳур туман судининг 2024 йил 19 июлдаги ҳукмига кўра, Жиноят кодексининг 165-моддаси 3-қисми “а,в” бандлари ва бошқа моддалари билан судланган Қудратуллаев Бахтиёр Запарович ва бошқаларга оид жиноят ишини кўриш 6 сентябрь куни бошланган.
Унда Тошкент шаҳар прокуратураси бўлим прокурори Ш.Шомирзаев иштирок этмоқда. Апелляция шикоятини Бахтиёр Қудратуллаев ва унинг ўғиллари ҳам берган. Суд ишида судланувчилар (8 нафар) ва уларнинг адвокатлари ҳамда 3 нафар манфаатдор шахслар иштирок этмоқда.
Кейинги суд иши 13 сентябрь куни давом эттирилади.
2023 йил 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олганди.
Июнь бошларида бўлиб ўтган суд мажлисида Бахтиёр Қудратуллаев ўзига қўйилган айбловларга иқрор эмаслигини билдирганди. Уч нафар судланувчи қисман, қолганлари эса айбловларга иқрор эмаслигини таъкидлаган. Шунингдек, у Ўзбекистонда “кўча”ни назорат қилишни унга давлат ташкилоти ишониб топширганини айтган эди.
10 июль кунги суд мажлисида прокурор 44 та эпизод бўйича айбланаётган “Бахти Ташкентский”га 20 йил озодликдан маҳрум қилиш жазосини тайинлаш, шунингдек, Жиноят кодексининг 34-моддаси (рецидив жиноят) 3-қисми “а” банди билан ўта хавфли рецидивист деб топишни ҳамда унинг ўғилларига нисбатан 11 ва 12 йилга озодликдан маҳрум қилиш жазосини сўраган эди.
Суд ҳукмига кўра, Бахтиёр Қудратуллаев Жиноят кодексининг 104-моддаси 3-қисми “г” банди, 109-моддаси 2-қисми, 165-моддаси 3-қисми “а”, “в” бандлари, 168-моддаси 4-қисми “в” банди, 242-моддаси 1-қисми, 243-моддаси ва 276-моддаси 2-қисми “а”, “б” бандларида назарда тутилган жиноятларни содир этганликда айбли деб топилиб, унга 20 йил муддатга озодликдан маҳрум қилиш жазоси тайинланди. Жиноят кодексининг 34-моддасига асосан у ўта хавфли рецидивист деб топилиб, тайинланган жазони махсус тартибли колонияларда ўташ белгиланди. Жиноят кодексининг 96-моддасига мувофиқ Б. Қудратуллаевга жазони ўташ вақтида гиёҳвандликдан даволанишнинг мажбурий чоралари қўлланилиши белгиланди. У ўта хавфли рецидивист деб топилган.
Қудратуллаев билан судланганлардан бири — 1964 йилда Тошкент вилоятида туғилган, муқаддам судланган Шукурали Қурбонов суд ҳукми ўқилганидан бир кун ўтиб, вафот этган. Унинг вафотига инфаркт сабаб бўлгани айтилган.
Изоҳ (0)