Ижтимоий тармоқларда Сурхондарё вилояти Бойсун туманида газ чиқиши оқибатида одамлар яшаб турган уйларидан бошқа ерга вақтинча кўчирилаётгани ҳақида хабарлар пайдо бўлди.
Фавқулодда вазиятлар вазирлиги ҳодиса тўғрисида расмий маълумот берди.
Унга кўра, 1 сентябрь куни соат 15:17 да Сурхондарё вилояти Бойсун тумани “Кўлқамиш” МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилган.
Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинган.
“Фуқароларнинг тан жароҳати олиш ва ҳалок бўлиш ҳолатлари қайд этилмаган. Вазият тўлиқ назорат остида.
Ҳодиса жойига тегишли ташкилотларнинг вакиллари етиб бориб, мутахассислар томонидан барча зарурий ишлар олиб борилмоқда”, дейилади Фавқулодда вазиятлар вазирлиги хабарида.
Энергетика вазирлигининг хабар беришича, воқеа жойига зудлик билан масъул шахслар етиб борган.
"Президентнинг шахсан топшириқларига асосан, Бош вазир ўринбосари Очилбой Раматов, Фавқулодда вазиятлар вазири генерал майор Абдулла Қўлдошев, Энергетика вазири Жўрабек Мирзамаҳмудов, Сурхондарё вилояти ҳокими Улуғбек Қосимов ҳамда “Ўзбекнефтгаз” АЖ бошқарув раиси Баҳодир Сидиқов ҳодиса жойига етиб боришди.
Бу ерда барча тегишли вазирлик ва ташкилотларни жалб этган ҳолда, Тезкор штаб ташкил қилинган. Техноген офат асоратларини бартараф этиш бўйича зарур чоралар кўрилмоқда.
Ҳодиса тўғрисида яна батафсил маълумот берилади", — дейилади Энергетика вазирли хабарида.
Изоҳ (0)