Барселонадаги ISGlobal институти томонидан Nature Medicine журналида чоп этилган тадқиқотга кўра, 2023 йилда Европада 47 690 нафар киши иссиқдан вафот этган.
2023 йил сўнгги ўн йилликдаги иссиқдан ўлимлар сони бўйича иккинчи ўринни эгаллаган. Биргина 2022 йилнинг ўзида бу 60 минг нафардан ортиқ ўлим қайд этилган.
Жазирама туфайли Грецияда бир миллион аҳолига 393 та ўлим тўғри келган бўлса, Болгарияда ушбу кўрсаткич 229 та, Италияда 209 та ва Испанияда 175 тани ташкил этган. Тадқиқотчилар 2023 йилда рекорд даражадаги энг иссиқ йил бўлганини таъкидлаган.
Ҳужжатда айтилишича, тадқиқотда Европанинг 35 та мамлакатидаги ҳарорат ва ўлим кўрсаткичлари таҳлил қилинган. Хабар қилинган ўлимларнинг ярмидан кўпи 2023 йил июль ўрталаридан августгача бўлган иссиқлик тўлқинлари пайтида содир бўлган. Хусусан, ўша йилнинг 18 июлида Сицилияда 44 даража иссиқ қайд этилган ва Грецияда ўрмон ёнғинлари авж олиб, бир неча кишининг ҳаётига зомин бўлган эди.
Тадқиқот муаллифларининг таъкидлашича, соғлиқни сақлашни яхшилаш, эрта огоҳлантириш тизимлари, алоқани яхшилаш ва меҳнатни муҳофаза қилиш соҳасидаги тараққиёт каби ҳукумат мослашув чораларисиз бундай ўлимлар сони 80 фоизга кўп бўлиши мумкин эди.
Изоҳ (0)