Қашқадарё вилоятида яшовчи М.О. ариза билан ИИО мурожаат қилиб, 50 млн сўм пули номаълум шахс томонидан фирибгарлик йўли билан ўзлаштирилганлигини маълум қилган. Бу ҳақда Киберхавфсизлик маркази хабар берди.
Маълум қилинишича, ўтказилган тезкор-қидирув тадбирлари натижасида, мазкур жиноятни Хоразм вилоятида яшовчи О.М. содир этганлиги аниқланган.
Гумонланувчи сифатида тергов органларига жалб этилган О.М. жабрланувчи М.О.га Telegram’даги Dreid fruits канали орқали ёзиб, унга қуритилган меваларни экспорт қилишда ҳомий бўлса, яхши фойда кўриши мумкинлигини, фойдадан ҳар 10 кунда унга 2 фоиз миқдорида пластик картасига пул ташлаб беришини айтган.
Фуқаро О.М. жабрланувчини алдаб, 50 млн сўм миқдоридаги маблағни ўзининг фойдаланувида бўлган банк картасига ўтказиб, шахсий эҳтиёжлари учун сарфлаб юборган.
Мазкур ҳолат юзасидан О.М.га нисбатан Жиноят кодексининг 168-моддаси (фирибгарлик) 3-қисми “г” банди билан жиноят иши қўзғатилган.
Изоҳ (0)