Наманган вилоятида яшовчи аёл Ш.Г. ариза билан мурожаат қилиб, ўзининг банк картасидаги 92 млн сўм номаълум шахс томонидан фирибгарлик йўли билан ўзлаштирилганини маълум қилган. Бу ҳақда Киберхавфсизлик маркази хабар берди.
Маълум қилинишича, ўтказилган тезкор-қидирув тадбирлари натижасида, мазкур жиноятни Наманган вилоятида яшовчи, муқаддам Жиноят кодексининг 168-моддаси (фирибгарлик) билан судланган Р.Н. содир этганлиги аниқланган.
Гумонланувчи сифатида тергов органларига жалб этилган Р.Н. жабрланувчи аёл Ш.Г. билан дастлаб Instagram, сўнг Telegram орқали ёзишган. Унга ўзини трейдерлик билан шуғулланишини ва пулларини биржа орқали оз фурсатларда кўпайтириб беришини ваъда қилиб, алдов йўли билан 92 млн сўм миқдоридаги пул маблағини фойдаланувида бўлган пластик картасига ўтказиб олган. Сўнг берган ваъдасини бажармасдан, пулларни ўз эҳтиёжларига сарфлаб юборган.
Мазкур ҳолат юзасидан Р.Н.га нисбатан Жиноят кодексининг 168-моддаси (фирибгарлик) 3-қисми билан жиноят иши қўзғатилган.
Изоҳ (0)