Қозоғистонда дам олиш кунлари беш нафар бола деразадан тушиб кетди 

Қозоғистоннинг Сатпаев шаҳрида 4 август куни олти ёшли бола 4-қаватда жойлашган хонадон деразасидан тушиб кетди. Бу ҳақда Tengrinews хабар берди.

Хабарга кўра, ҳозирда шифокорлар унинг ҳаёти учун курашмоқда.

Худди шу куни Олмаотада олти ёшли қиз иккинчи қават деразасидан қулаб тушган. У кўплаб тан жароҳатлари билан касалхонага ётқизилган.

Шунингдек, 3- август куни Остонада бир ёшли бола бешинчи қаватдаги деразадан йиқилиши натижасида турли тан жароҳатлари билан касалхонага ётқизилган.

Шу куни Олмаотада уч ёшли қизалоқ 15-қават деразасидан тушиб кетиши оқибатида ҳалок бўлган.

Темиртау шаҳрида 3 август куни олти ёшли бола учинчи қаватдаги деразадан қулаб тушган. У касалхонага ётқизилган.

Мамлакат Фавқулодда вазиятлар вазирлиги қозоғистонликлардан болаларни деразадан қулашдан ҳимоя қилиш чораларини кўришни сўраган. Бунинг учун:

• болаларни қаровсиз қолдирмаслик;
• болалар бўлган квартираларнинг деразаларини махсус ҳимоя воситалари билан жиҳозлаш;
• бола деразани ўзи очолмаслиги учун дераза тутқичларини тўсиб қўйиш;
• бола деразага чиқа олмаслиги учун мебелни деразадан узоқроққа жойлаштиришни тавсия қилган.