Ўзбекистонда фаолият юритаётган тадбиркорлик субъектлари сони бир йилда 23 753 тага камайди. Бу ҳақда Статистика агентлиги эълон қилган пресс–релизда маълумот берилган.
2024 йил 1 июль ҳолатига кўра, республикада фаолият кўрсатаётган тадбиркорлик субъектлари сони 390 898 тани ташкил этди. Ҳудудлар кесимида уларнинг сони қуйидагича:
- Тошкент шаҳрида — 86 504 та;
- Тошкент вилоятида — 35 242 та;
- Самарқанд вилоятида — 34 553 та;
- Фарғона вилоятида — 31 824 та;
- Бухоро вилоятида — 25 899 та;
- Қашқадарё вилоятида — 24 595 та;
- Андижон вилоятида — 23 169 та;
- Хоразм вилоятида — 23 117 та;
- Наманган вилоятида — 22 037 та;
- Қорақалпоғистон Республикасида — 20 371 та;
- Сурхондарё вилоятида — 19 461 та;
- Навоий вилоятида — 18 509 та;
- Жиззах вилоятида — 15 640 та;
- Сирдарё вилоятида — 9 977 та.
Қайд этилишича, 2023 йилнинг 1 июлида мамлакатдаги тадбиркорлик субъектлари сони 414 651 тани, 2022 йилнинг мос даврида эса 497 293 тани ташкил этган. Ўтган йили улар сони 82 642 тага камайган бўлса, жорий йилда 23 753 тага қисқарди.
Ҳозирда фаолият юритаётган тадбиркорлик субъектларининг 387,1 мингтаси кичик корхона ва микрофирмалар ҳисобланади. Шундан 148 714 таси (38 фоиз) савдо, 62 153 таси (15,9 фоиз) саноат, 32 547 таси (8,3 фоиз) қишлоқ, ўрмон ва балиқчилик хўжалиги, 29 770 таси (7,6 фоиз) қурилиш, 27 673 таси (7,1 фоиз) яшаш ва овқатланиш бўйича хизматлар йўналишидаги корхоналар ташкил этади.
Агентлик таҳлилига кўра, Ўзбекистондаги ҳар учинчи корхона савдо соҳасида фаолият юритади. Уларнинг 148 мингтаси (99,5 фоизи) кичик бизнес субъектларидир.
Ҳудудлар бўйича энг кўп кичик бизнес субъектлари Тошкент шаҳри (21,9 фоиз), Тошкент (9 фоиз), Самарқанд (8,9 фоиз), Фарғона (8,2 фоиз) ва Бухоро (6,6 фоиз) вилоятларида фаолият кўрсатмоқда.
Изоҳ (0)