АҚШ стратегик бомбардимончи самолётлари 21 июль куни Россия чегаралари томон учган. Бу ҳақда Россия ҳукумати тарқатган хабарга асосланиб, The Moscow Times нашри хабар берди.
Манбада айтилишича, АҚШга қарашли иккита стратегик бомбардимончи самолёт Арктика бўйлаб Баренс денгизи устидан парвозни амалга оширган. Самолётларнинг Россия чегарасига яқинлашуви эса огоҳлантириш сигналлари ишлаб кетишига сабабчи бўлган.
Россия ҳаво-чегара ҳудуди бўйлаб бомбардимончи самолётларга қарши туриш учун қирувчи самолётларини учирган. Бир неча дақиқалик ҳаво манёврлари оқибатида самолётлар баҳсли ҳаво зонасидан суриб чиқарилган.
“Россия қирувчи самолётлари экипажи АҚШ ҳарбий-ҳаво кучларининг B-52H стратегик бомбардимончи самолётлари чегарага яқинлашганини аниқлади. Россия қирувчи самолётлари уларга яқинлашганда, стратегик бомбардимончи самолётлар парвоз йўналишини тўғрилаб, ҳудуддан узоқлашди ва кейин Россия давлат чегарасидан бошқа томонга бурилиб кетди”, дейилади Кремль матбуот идораси хабарида.
АҚШ ҳарбийлари мунтазам равишда халқаро сувлар устида стратегик парвозларни амалга оширади. Вашингтондаги ҳукумат амалиётлар нейтрал ҳаво ҳудудида ва халқаро қонунларга мувофиқ амалга оширилганини таъкидлаб келади.
Москва сўнгги ойларда ўтказилган Ғарб машғулотларига нисбатан кескин жавоб қайтаришни бошлаган. Июнь ойида Қора денгиз устида АҚШ ҳарбий дронлари учирилиши “тўғридан тўғри” ҳарбий тўқнашувга олиб келиши мумкинлиги ҳақида огоҳлантирилган.
Изоҳ (0)