Исроил Яманнинг Ҳудайда портига зарба берди, нефть омборлари ва электр станциялари йўқ қилинди (видео) 

Исроил авиацияси 20 июль куни Яман ғарбидаги Ҳудайда порт шаҳрига зарбалар берган. Бу ҳақда Al Arabiya нашри хабар қилди.

Манбада айтилишича, ҳужумлар асосан нефть иншоотларига қаратилган. Ҳудайда шаҳрига яқин нефть омборлари ва электр тизимлари портлатилиб, вайрон қилинган.

“Исроилнинг Ҳудайда портидаги нефть омборларига уюштирган ҳужумлари қурбонлар ва йўқотишларга олиб келди. Ҳаво кучлари бир қанча муҳим ҳудудларга зарба берди”, дейилади ҳусийлар матбуот бўлими хабарида.

Исроил ҳарбийлари сўнгги ойларда Исроилга қарши уюштирилган юзлаб ҳужумларга жавобан Исроил қирувчи самолётлари Яманнинг Ҳудайда портини нишонга олганини билдирган. “Ансоруллоҳ” кескинликдан чекинмаса, Исроилнинг ҳужумлари ҳам кучайиши айтилган.

Ҳусийлар расмийлари Исроил ҳужум учун катта бадал тўлашини билдирган. “Қасос зарбаси” оғир бўлиши, Исроилни ҳимоя қилишга уринганлар ҳам аяб ўтирилмаслиги айтилган.

“Сионистик тузилма фуқаролик объектларини нишонга олгани учун бадални албатта тўлайди. Биз кескинлашувга қарши фаол курашамиз. Бизнинг жавобимиз қатъий бўлади”, деган “Ансоруллоҳ” сиёсий бюроси аъзоси Муҳаммад ал-Бухайтий.

Бир қанча Яқин Шарқ араб нашрлари Исроил ҳужумлари Ҳудайдадан бошқа Яман ҳудудларида ҳам давом этаётганини билдирган. Ижтимоий тармоқларда тинч аҳоли турар жойларига қилинган ҳужум тасвирлари пайдо бўлмоқда.