Қозоғистоннинг Шимкент шаҳрида уч киши Конго-Қрим геморрагик иситмаси билан касалланди, улардан бири вафот этди. Бу ҳақда “Otyrar” хабар берди.
Маълум қилинишича, беморларнинг 2 нафари юқумли касалликлар шифохонасида даволаниб, уйига жавоб берилган. Сайрам туманида яшовчи 61 ёшли фуқаро эса ўта оғир аҳволда реанимацияга ётқизилган ва у ерда уч кун ётиб, керакли даволанишни олган. Шифокорларнинг саъй-ҳаракатларига қарамай, эркак ҳушига келолмай вафот этган.
Ҳозирда яна бир бемор гумон остида, унинг Конго-Қрим геморрагик иситмаси бўйича таҳлиллари мутахассислар томонидан текширилмоқда.
Конго-Қрим геморрагик иситмасининг асосий ташувчиси иксод каналаридир. Каналар иссиқ қонли ҳайвонлар ва ҳаво ҳарорати исиши билан одамларга ҳужум қилади. Кана чақиш мавсуми мартдан июнгача ва кузда сентябрдан октябргача давом этади.
Касалликдан ҳимояланиш бўйича 5 та маслаҳат
- Кана билан алоқа қилишдан сақланинг: инфекцияланган кана чақиши орқали касаллик узатилади. Шунинг учун кана тез-тез учрайдиган жойларда эҳтиёт чораларини кўриш керак.
- Очиқ ҳавода бўлганингиздан кейин кийимингизни текширинг: киймингиздан кана топилса, уни махсус пинсетлар ёки бошқа воситалар ёрдамида имкон қадар тезроқ олиб ташлаш керак.
- Инфекцияланган ҳайвонлар ва уларнинг қони билан алоқа қилишдан сақланинг: вирус ҳайвонларнинг тўқималари билан алоқа қилиш орқали юқиши мумкин. Шу сабабли касал ҳайвонлар билан алоқа қилишдан қочиш керак
- Гигиена чораларига риоя қилинг: Қўлингизни мунтазам равишда совун билан ювиш инфекция тарқалишининг олдини олиш учун муҳим қадамдир.
- Симптомлардан огоҳ бўлинг: иситма, бош оғриғи, мушак оғриғи, кўнгил айниши, қусиш ва қон кетиши каби белгилар пайдо бўлса, дарҳол шифокорга мурожаат қилинг. Касалликни эрта аниқлаш ва даволаш соғайиш имкониятини сезиларли даражада оширади.
Изоҳ (0)