Самарқанд вилоятининг Иштихон ва Тойлоқ туманларида қалбаки акциз маркали алкоголь маҳсулотлари сотаётган савдо дўконлари фош этилди, деб хабар бермоқда Бош прокуратура ҳузуридаги департамент.
Хабар берилишича, департаментнинг Иштихон туман бўлими томонидан тезкор тадбир ўтказилган. “Тупори” маҳалласи ҳудудидаги “Ж.Б.” оилавий корхонасининг савдо дўконида умумий баҳоси 243,8 миллион сўмлик 87 турдаги жами 5 886 дона қалбаки акциз маркали алкоголь ва 43 турдаги 2 035 қути акциз маркасиз тамаки маҳсулотлари сотувга қўйилгани аниқланиб, ушбу маҳсулотлар ашёвий далил сифатида олинган.
Шу каби, департаментнинг Тойлоқ туман бўлими томонидан ўтказилган тезкор тадбирда “Ворсин” маҳалласи ҳудудидаги “А.” МЧЖга қарашли савдо дўконида 79 турдаги жами 868 дона қалбаки акциз маркали алкоголь ва 10 турдаги 150 қути акциз маркасиз тамаки маҳсулотлари сотувга қўйилгани аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)