Жанубий Кореяда фуқаролик хизмати соҳасига жалб қилинган робот “ўз жонига қасд қилди”. Бу ҳақда Жанубий Корея маҳаллий нашрларига таяниб, Daily Mail хабар берди.
Манбада айтилишича, давлат фуқаролик хизмати тизимига жалб қилинган робот автоном тарзда ўзини баландликдан ташлаб юборган. Ушбу ҳодисадан олдин роботда ҳеч қандай ишдан чиқиш ва тизим носозлиги каби ҳолатлар бўлмаган.
Тепадан қулаган робот масофадан бошқарув сигналларига ва алоқа буйруқларига жавоб бермай қўйган. Мамлакатдаги қатор расмийлар юз берган ҳодисани робот ўз жонига қасд қилиши билан боғлиқ мамлакатдаги биринчи ҳолат дея баҳолаган.
Гувоҳларга кўра, робот ўзини зинадан ташлаб юборишдан олдин шартли доира бўйлаб узоқ пайт бир нуқта атрофида айланган. Ходимлар у шубҳали объектни аниқлаган деб ўйлашган. Бир оз вақтдан сўнг эса робот зинадан ошиб, пастга қулаган.
“Роботдан кундалик ҳужжатларни етказиб бериш, тарғибот ҳамда ва маҳаллий аҳолига маълумот етказишда фойдаланилар эди. Ҳозирда унинг шикастланган қисмларини йиғдик ва таҳлилга топширдик”, дейилади расмийлар хабарида.
Роботдаги сўнгги топшириқлар тарихини текширган мутахассислар қизиқ ҳолатга дуч келган. Фуқаролик хизмати роботига кунлик белгиланган дастурий меъёрдан бир неча баробар кўп вазифалар топширилган. Робот қисқа муддатда кўп ва тезкор операциялар бажаришига тўғри келган. Оқибатда унинг тизимида айрим функция бузилишлари кузатилган.
Маълумот ўрнида, робот 2023 йилнинг август ойида Жанубий Кореяга олиб келиниб, вазифага тайинланган. У Калифорниядаги робот-официант стартапи Bear Robotics томонидан ишлаб чиқарилган.
Робот одатий меҳнат низоми бўйича эрталаб соат 9 дан кечки 18:00 гача ишлаган. У, шунингдек, ўзининг давлат хизмати ходими картасига ҳам эга бўлган.
Изоҳ (0)