Исроил ҳаво кучлари 24 июнь куни Ғазо марказига берган зарбалари оқибатида камида 11 нафар фаластинлик ҳалок бўлган. Бу ҳақда Al Arabiya нашри хабар берди.
Манбада айтилишича, Исроил кучлари турли ҳудудларда серияли ҳужумлар ташкил этган. Биринчи ҳужум Ғазо шаҳридаги Шати тарихий қочқинлар лагери яқинида кузатилган. Исроил самолётлари озиқ-овқат тарқатиш марказига зарба берган.
Лагерга ҳужумда 3 киши ҳалок бўлгани тасдиқланган. Ўнлаб одамлар жароҳатланган. Расмийлар кўплаб фуқаролар вайрона остида қолганини маълум қилган.
Иккинчи ҳужум Бани Суҳайла шаҳри яқинида рўй берган. Йўл бўйида турган юк машиналарига ҳужум қилиниши оқибатида 8 киши воқеа жойида ҳалок бўлган.
Расмийлар қурбонлар барчаси тинч аҳоли вакиллари эканлигини, улар орасида ҲАМАС аскарлари йўқ эканлигини хабар берган. Исроил ўз ҳаво кучларининг Ғазо марказига ҳужум уюштиргани ҳақидаги хабарни рад этган.
Ғазо Соғлиқни сақлаш вазирлигининг маълум қилишича, тунда Ғазо шаҳридаги тиббий клиникага Исроил ҳаво ҳужуми натижасида Ғазо тез ёрдам ва фавқулодда вазиятлар департаменти директори ҳалок бўлган. Исроил ҳарбийлари эса ушбу ҳужумда ҲАМАСнинг юқори мартабали қўмондони Муҳаммад Салоҳ ҳалок бўлганини айтган.
Изоҳ (0)