Президент администрацияси ҳузуридаги республика ишчи гуруҳи Наманган вилоятининг Чортоқ туманида фаолият олиб бормоқда. Бу ҳақда “Дарё” мухбири Азизбек Абдувалиев хабар бермоқда.
Бу борада чекка ҳудудлар ва маҳаллалар инфратузилмасини яхшилашга алоҳида эътибор қаратилмоқда. Уйма-уй юриб, аҳолининг ижтимоий-иқтисодий ва коммунал соҳалардаги муаммоларига ечим топиш чоралари кўрилмоқда.
Жумладан, “Балиқкўл” маҳалласида ўтказилган ўрганишлар якуни бўйича аҳоли талаб ва эҳтиёжларидан келиб чиқиб, вилоят марказидаги ихтисослашган тиббий муассасалар мутахассислари иштирокида аҳоли чуқурлаштирилган тиббий кўрикдан ўтказилди.
Тиббий кўрикка 400 нафардан зиёд фуқаро қамраб олиниб, уларнинг ярмидан ортиғига соғломлаштириш учун амбулатор ва стационар даво муолажалари тавсия қилинди. Бу имкониятдан, хусусан, туман марказидан қарийб 40, вилоят марказидан эса 60 километр узоқда жойлашган маҳалла хотин-қизлари ва кексалари мамнун бўлди.
Яна бир муҳим йўналиш — аҳоли бандлигини таъминлаш мақсадида маҳаллада меҳнат ярмаркаси ҳам ташкил этилди. Унда тумандаги 74 та корхона, ташкилот ва муассаса вакиллари ўзларида мавжуд 1188 та бўш иш ўрни билан қатнашди.
Республика ишчи гуруҳи томонидан Чортоқ туманида ичимлик суви, электр энергияси таъминоти, ички йўлларни таъмирлаш, табиий газ қурилмаларини соз ҳолатга келтириш билан боғлиқ муаммолар ҳам ўрганилиб, уларни ҳал этишга соҳа мутахассислари жалб этилмоқда.
Изоҳ (0)