Олий Мажлис Қонунчилик палатасининг 11 июндаги мажлисида депутатлар “Ўзбекистон Республикаси Вазирлар Маҳкамаси тўғрисида”ги Конституциявий қонун лойиҳасини иккинчи ўқишда кўриб чиқиб, қабул қилди.
Қуйи палата матбуот хизматининг хабар қилишича, мазкур қонун лойиҳаси билан Вазирлар Маҳкамасининг мақоми, таркиби, уни шакллантириш тартиби, ваколатлари ҳамда фаолиятини ташкил этишга оид бир қатор янгиликлар назарда тутиляпти.
Хусусан, бош вазир, унинг ўринбосарлари ва вазирлар билан биргаликда ҳар ярим йилда Қонунчилик палатасига ҳисобот тақдим этиши белгиланмоқда. Янги таҳрирдаги Конституциядан келиб чиқиб, ҳукуматнинг иқтисодиёт, бюджет, молия, солиқ, экология ва атроф-муҳитни муҳофаза қилиш соҳаларидаги ваколатлари қайта кўриб чиқилмоқда.
Қонун лойиҳасининг 4-моддасида республика ижро этувчи ҳокимият органларининг (вазирлик, қўмита, агентлик, инспекция) хусусан, ҳудудий бўлинмалар кесимидаги ҳар бирининг мақоми, уларни ташкил этиш ва тугатишнинг аниқ, ягона тартиби ҳамда бир-биридан фарқловчи мезонлари белгилаб берилмоқда.
Шунингдек, вазирларнинг ўзи раҳбарлик қилаётган вазирликда ишни натижадор ва самарали ташкил этиш, бириктирилган соҳа ва тармоқларда ягона давлат сиёсатини самарали олиб бориш, уни ривожлантириш бўйича мақсадли кўрсаткичларга эришиш, йил якунигача мақсадли кўрсаткичлар (индикаторлар)га эришиш ҳолати юзасидан ҳисобот бериш ва уни очиқ эълон қилиш каби йўналишлар бўйича масъулияти ва шахсий жавобгарлиги кучайтирилмоқда.
2024 йилнинг февралида ушбу қонун лойиҳаси дастлабки тарзда кўриб чиқилганди. У 9 та боб, 55 моддадан иборатлиги, ҳукуматнинг иқтисодиёт, бюджет, молия, солиқ, экология ва атроф-муҳитни муҳофаза қилиш соҳаларидаги ваколатлари кенгайтирилаётгани маълум қилинганди.
Депутатларнинг қайд этишича, қонун лойиҳасининг қабул қилиниши Вазирлар Маҳкамаси ишини сифат жиҳатдан янги босқичга олиб чиқиш, замонавий механизмларни жорий этиш, ҳукумат аъзоларининг бириктирилган соҳаларда аниқ натижаларга эришиши учун шахсий масъулияти оширишга хизмат қилади.
Изоҳ (0)