Туркия хавфсизлик кучлари 25 май куни Эгей денгизида 72 нафар ноқонуний муҳожирни қутқариб қолган. Бу ҳақда Anadolu нашри хабар берди.
Ҳолат Туркиянинг Муғла вилоятига қарашли Бодрум шаҳри қирғоқларида юз берган. Туркия қирғоқ қўриқлаш хизмати қирғоқдан унча узоқ бўлмаган ҳудудда муҳожирлар қайиғи аниқланганини тасдиқлаган.
Манбага кўра, ноқонуний муҳожирларни олиб кетаётган қайиқнинг двигатели ишламай қолган. Чўкиш арафасида турган қайиқдаги муҳожирларни қутқариш учун Туркия қирғоқ қўриқлаш қўмондонлиги томонидан махсус қайиқлар юборилган.
Қутқарувчилар қайиқда 22 нафар вояга етмаган бола борлигини маълум қилган. Қутқариб олинган муҳожирларга тезкор равишда ёрдам кўрсатилган.
Қайиқ ичида бўлган бир нафар фуқаро одам савдоси айблови билан қўлга олинган. Қолган муҳожирлар эса вилоят миграция бошқармасига юборилган.
Изоҳ (0)