Ўзбекистонда тадбиркорларга субсидия, имтиёз ва преференцияларни тақдим этиш тартиблари такомиллаштирилади. Бу ҳақда Адлия вазирлиги хабар берди.
Вазирликка кўра, “Тадбиркорлик субъектларига субсидиялар, имтиёзлар ва преференцияларни тақдим этиш тартибларини такомиллаштириш бўйича қўшимча чора-тадбирлар тўғрисида”ги президент қарори қабул қилинди.
Қарорга кўра, юридик шахс ташкил этган ҳолда фаолият юритаётган тадбиркорларга субсидиялар, солиқ ва божхона имтиёзлари ҳамда преференциялар (қўллаб-қувватлаш чоралари) уларнинг рейтинг даражасидан келиб чиққан ҳолда янги тартибда жорий этилади.
Қўллаб-қувватлаш чоралари “V” ва ундан юқори рейтинг даражасига эга тадбиркорларга амалдагисига нисбатан қуйидаги миқдорларда тақдим этилади:
- “ААА” тоифа – амалдаги миқдорнинг 100 фоизи;
- “АА” тоифа – амалдаги миқдорнинг 90 фоизи;
- “А” тоифа – амалдаги миқдорнинг 80 фоизи;
- “ВВВ” тоифа – амалдаги миқдорнинг 70 фоизи;
- “ВВ” тоифа – амалдаги миқдорнинг 60 фоизи;
- “В” тоифа – амалдаги миқдорнинг 50 фоизи.
Шунингдек, қўллаб-қувватлаш чоралари рўйхатдан ўтганига 6 ой бўлмаган, президент фармонига мувофиқ 4 ва 5-тоифадаги туманларда фаолият юритаётган тадбиркорларга уларнинг рейтинг даражасидан қатъи назар амалдаги миқдорларда тақдим этилади.
Тадбиркорларнинг рейтинг даражаси:
- пасайган тақдирда, қўллаб-қувватлаш чораларини тақдим этиш 3 ой давомида сақлаб қолинади;
- юқорилаган тақдирда, қўллаб-қувватлаш чоралари кейинги ойдан бошлаб янгиланган рейтинг даражасига мувофиқ миқдорларда тақдим этилади.
2025 йил 1 январдан “subsidiya.mf.uz” платформасида тадбиркорларга тақдим этиладиган қўллаб-қувватлаш чораларининг турлари, муддатлари ва тартибини ўз ичига олган алоҳида реестр юритилади.
Изоҳ (0)