Италия полицияси 22 май куни Интерпол қидирувида бўлган 17 нафар туркияликни ҳибсга олди. Бу ҳақда Anadolu нашри хабар берди.
Манбада айтилишича, қўлга олинганлар жами 19 нафар бўлиб, улар орасида 2 нафари Италия фуқароларидир. Улар барчаси Милан шаҳрида қўлга олинган.
Туркия ички ишлар вазири Али Ерликая ҳолат ҳақида нисбатан батафсил маълумот берган. Қўлга олинганларга раҳбарлик қилгани айтилган Барис Боюн Интерпол томонидан қизил даражадаги огоҳлантириш билан қидирувда бўлган.
Расмийлар маълум қилишича, ҳибсга олиш операцияси Туркия Хавфсизлик бош бошқармаси таркибидаги контрабанда ва уюшган жиноятчиликка қарши кураш маркази, Интерпол ва Римдаги Италия полицияси билан ҳамкорликда амалга оширилган.
“Биз уюшган жиноий гуруҳларни йўқ қилишга ва уларни жавобгарликка тортишга қатъий қарор қилдик”, — дейилади Туркия ички ишлар вазири баёнотида.
Ҳибсга олинган 19 нафар фуқаро трансчегаравий жиноятчилик, контрабанда ва уюшган жиноий гуруҳ ташкил этишда айбланмоқда. Ҳозирда полиция гуруҳга алоқадорлиги бўлган шахслар тармоғини аниқлаш учун тергов олиб бораётгани билдирилган.
Изоҳ (0)