Балх вилоятидаги энг йирик гилам сотиладиган бозорлардан бири Мозори Шариф шаҳрида жойлашган. “Дарё” мухбири Мозори Шарифдаги гилам дўконларига бориб, гилам сотувчилар билан суҳбатлашди.
Балхдаги бир қатор гилам сотувчиларнинг айтишича, бу соҳа бозори мисли кўрилмаган таназзулга дуч келган.
Сотувчиларга кўра, Афғонистоннинг ички гиламларининг аксарияти Фарёб, Жузжон, Сарпул ва Балх вилоятларида тўқилган бўлиб, бу ишни, асосан, Афғонистоннинг шимолий вилоятларидаги ўзбеклар ва туркманлар амалга оширади.
Ҳозирда Афғонистон гиламлари учун на мамлакат ичида, на ташқарида мос бозор бор.
Расмий статистик маълумотларга кўра, авваллари Афғонистоннинг шимолий вилоятларида йилига бир миллион 500 минг квадрат метрдан ортиқ гиламлар ишлаб чиқарилган.
Аммо гилам сотувчиларнинг айтишича, одамларнинг молиявий имкониятлари яхши эмаслиги сабабли гилам сотувлари пасайган.
Балх вилоятига гиламлар, асосан, Туркия, Эрон ва Ўзбекистондан келтирилади. Гилам сотувчилардан бири Забиҳуллоҳнинг айтишича, одамлар Эрон ва Ўзбекистон гиламларини арзонлиги учун афзал кўришади.
Унинг сўзларига кўра, янги турмуш қурганлар ҳам асосан Эрон ва Ўзбекистон гиламларини сотиб олишади.
“Халқнинг иқтисодий аҳволи яхшимаслиги туфайли бирорта ҳам гилам сотмайдиган кунлар бор”, — дейди Забиҳуллоҳ.
Ҳозирда Мозори Шариф гилам дўконлари бозорида бир квадрат метр гилам нархи 5 доллардан 50 долларгача сотилмоқда.
Изоҳ (0)