Статистик маълумотларга кўра, дунёдаги ўлимларнинг асосий сабабларидан бири юрак-қон томир касалликлари ҳисобланади. Уларнинг аксарияти ўз вақтида эътибор берилмаган ва даволанмаган юқори қон босимидан келиб чиқади.
Қон босими баъзан ошиб турадиган инсонлар доим ҳам кимёвий препаратлар билан даволаниши шарт эмас. Табиат инъом этган табиий маҳсулотлар орасида узум қоқиси — майиз қон босимини нормаллаштириш хусусиятига эга. Майиз калийга бой маҳсулот бўлиб, бир оз ошган артериал қон босимини туширишга ёрдам беради.
Агар жисмоний машқларни канда қилмаслик, спиртли ичимликларни чеклаш, чекишни ташлаш ва яхши ухлаш каби соғлом турмуш тарзига риоя қилсангиз, шифокор кўрсатмасига биноан қон босимини кундалик маҳсулотлар ёрдамида меъёрда сақлаб туриш имконияти мавжуд.
Шунингдек, таркибида натрий миқдори кўп бўлган маҳсулотларни чеклаш ва калийга бой озиқ-овқатларни истеъмол қилиш юрак ва қон томир фаолиятига ижобий таъсир этади.
2022 йилда European Heart Journal нашрида чоп этилган тадқиқот шуни кўрсатдики, калийга бой маҳсулотлар (жумладан майиз)ни кўпроқ истеъмол қилган беморларда қон босими меъёрда ва юрак хасталиклари хавфи эса кам бўлади.
Агар сиз майизни яхши кўрмасангиз, қон босимингизни назорат қилишга ёрдам берадиган бошқа калий таркибли озиқ-овқатлар мавжуд. Уларга банан, маракуйя, авокадо, турли сабзавотлар, дуккаклилар ва сут маҳсулотлари киради.
Изоҳ (0)