“Барселона” президенти Хоан Лапорта “Эл класико” қайта ўтказилиши мумкинлигини инкор этмаяпти.
Ла Лиганинг 32-туридан ўрин олган ўйинда “Барселона” вингери Ламин Ямал бурчакдан узатилган тўпни дарвоза томон тўғрилаб юборди. Тўпни эса дарвозабон Андрей Лунин қайтариб юборди. Бош ҳакам Сесар Сото Градо гол бўлмаганини таъкидлади. Шундан сўнг видеоассистентига мурожаат қилди ва якунда барибир ўз қарорида қолди.
“Барселона” “Реал”га 2:3 ҳисобида мағлуб бўлди.
“Ҳакамлар қандай қийинчиликларга дуч келишини биламиз, аммо ВАР каби жиҳозлар айнан шундай вазиятлар учун керак бўлади.
Ўйин пайти бир нечта баҳсли вазиятлар юзага келди, улардан бири ўйин тақдирини ўзгартириб юбориши ҳам мумкин бўлган Ламиннинг зарбасидир.
Клуб сифатида биз нима бўлганини билишни истаймиз ва айнан шу сабабдан “Барселона” зудлик билан Испания Қироллик футбол федерациясининг техник ҳакамлар қўмитаси билан боғланиб, ушбу воқеанинг тўлиқ видео ва аудио ёзувларини тўплайди.
Агар ушбу ҳужжатларни кўриб чиққандан сўнг, клуб воқеани ҳал қилишда хатоликка йўл қўйилганини англаса, биз вазиятни тўғрилаш учун барча чораларни, шу жумладан, қонуний чораларни ҳам кўрамиз.
Агар гол бўлгани исботланса, яна ҳаракатни давом эттириб, ўйинни қайтадан ўтказишга келишишимиз ҳам мумкин. Европадаги яна бир ўйинда айнан ВАР хатоси туфайли ўйин қайта ўтказилган”, — дейди Лапорта.
Қайд этиб ўтамиз, январь ойида ВАР хатоси туфайли Бельгия чемпионати доирасидаги “Андерлехт” ва “Генк” ўртасидаги ўйин қайтадан ўтказилган.
Изоҳ (0)