АҚШ Миллий ҳаво гвардияси ходими Жек Тейшейра Америка ҳарбий идорасининг махфий ҳужжатларини ошкор қилганлик айбини тан олди. Бу ҳақда Америка ОАВга таяниб, Deutsche Welle хабар берди.
22 ёшли Тейшейра 4 март куни жосуслик тўғрисидаги қонунга биноан миллий мудофаа маълумотларини қасддан эгаллаш ва узатишда айбдорлигини тан олган. Бу Миллий гвардия аъзоси сўнгги йилларда Пентагонга оид махфий маълумотларнинг тарқалишини уюштирганликда гумонланиб ҳибсга олинганидан деярли бир йил ўтиб содир бўлган. Айбни тан олиш эвазига прокурорлар Тейшейрани бошқа Жосуслик қонунини бузганликда ёки бошқа жиноятларда айбламасликка келишиб олган.
Массачусец округи судьяси Индира Талавани Бостон федерал судида сентябрда ҳукм чиқарилишини белгилаган. Тейшейра 11 йилдан қарийб 17 йилгача қамоқ жазосига ҳукм қилиниши мумкин.
Жек Тейшейра 2023 йил 13 апрелда геймерлар орасида машҳур бўлган Discord ижтимоий медиа платформасидаги Thug Shaker Central чат гуруҳида пайдо бўлган махфий ҳужжатларни ошкор қилганликда айбланиб қўлга олинган. АҚШ расмийларига кўра, Тейшейра биринчи марта 2022 йил октябрь ойида у ерга махфий маълумотларни жойлаштирган.
Изоҳ (0)