Жо Байден “Ҳизбуллоҳ” ва Исроил ўртасидаги низога ечим топиш учун Ливанга махсус вакил жўнатди — CNN

АҚШ президенти Жо Байден Исроил ва Ливандаги “Ҳизбуллоҳ” гуруҳи ўртасидаги кескинлик кучайиши муносабати билан, муаммога дипломатик ечим топиш учун ўз вакилини Байрутга жўнатди. Бу ҳақда CNN хабар берди.

Хабарда айтилишича, Байденнинг бош маслаҳатчиси Амос Хочштейн 4 март куни Байрутда матбуот анжуманида иштирок этган. Маслаҳатчи йиғилишда Исроил шимолидаги янги кескинлик Ливан ва Исроил халқининг манфаатларига мос келмаслигини, чекланган кўламдаги пассив уруш назоратдан чиқиб кетиши мумкинлигини маълум қилган.

Амос Хочштейн “Ҳизбуллоҳ” ва Исроил ўртасида жанговар ҳаракатлар бошланганидан бери Ливанга бир неча бор ташриф буюрган. Исроил ва Ливан чегарасида давом этаётган жанговар ҳаракатларга дипломатик ечим топиш учун Ливаннинг юқори мартабали расмийлари билан музокаралар ўтказган.

Хабарга кўра, АҚШ маъмурияти Исроилнинг Ливанга қуруқликдан бостириб киришни режалаштираётганидан хавотирда. Агар дипломатик саъй-ҳаракатлар “Ҳизбуллоҳ”ни Исроил билан кескинликдан қайтара олмаса, Яқин Шарқ можароси кучайиши мумкин. Бу эса қўшимча куч ва ресурслар йўналтирилишини тақозо этади.

Аввалроқ Ливандаги “Ҳизбуллоҳ” раҳбари Ҳасан Насруллоҳ Исроил билан жангларни тўхтатишга қаратилган хориж саъй-ҳаракатларига раддия берган эди. Бунга сабаб сифатида эса ғарбликларнинг таклифи Ғазода ўт очишни тўхтатишга эмас, балки Исроил хавфсизлигига қаратилгани келтирилган эди.