Андижонда ички ишлар ходимлари сабаб ўсмир йигитнинг ҳаёти сақлаб қолинди (видео) 

Ижтимоий тармоқларда Андижон вилояти ички ишлар бошқармаси патрул-пост хизматининг бир гуруҳ ходимларига миннатдорлик билдирилган хабарлар тарқалди. 

Маълум бўлишича, Андижон шаҳар Ўзбекистон кўчасида ёшлар ўртасида бошланган жанжал Андижон вилояти ички ишлар бошқармаси патрул-пост хизмати ходимларининг ҳушёрлиги боис ўз вақтида бартараф этилган.

Келтирилишича, ўсмир йигитлар жанжаллашиб, бир кишига икки-уч йигит мушт туширган. Жанжал компьютер ўйинларидаги жараёндан бошланган. Андижон вилоят Ички ишлар бошқармаси патрул-пост хизмати ходимлари буни кўргач, биринчи бўлиб калтакланган болага тиббий ёрдамни кўрсатиб, шифохонага олиб борган.

“Хизмат ҳудудимизни назорат қилиб юрганимизда йўлнинг ўнг тарафида ўсмирлар ўзаро жанжаллашаётган экан. Қарасак, икки киши бир болани уриб, ҳушидан кеткизиб қўйган экан. Шеригим дарҳол калтак еган болага биринчи ёрдам кўрсатишга уринди. Боланинг тили кетиб қолган бўлган, беҳуш эди. Биринчи ёрдам кўрсатишимизга қарамай, у ўзига келмади. Машинамизда олиб бориб, шифокорларга топширдик”, — дейди инспектор.

Ҳозирда боланинг аҳволи яхши.