Украина президенти Владимир Зеленский мамлакатга Европа қўшинларини юбориш эҳтимолига муносабат билдирди. Бу ҳақда “Украинская правда” хабар берди.
Зеленский Франция президенти Эммануэл Макроннинг Киевга навбатдаги ташрифи чоғида у билан Украинага қўшин юбориш ташаббусини муҳокама қилмоқчи. Сиёсатчи Россия билан урушда Украинанинг мудофаа қобилиятини оширадиган ҳар қандай ташаббус яхши бўлишини таъкидлади.
“Мен ўша саммитда (26 февраль куни Парижда бўлиб ўтган Украинага ёрдам бўйича халқаро конференция) қатнашмаганман. У (Макрон) Украинага келганида мамлакатни мустаҳкамлаш бўйича маълум янги ғоялар ҳақида гаплашишини ва маълумот алмашишини айтди. Бу март ойининг ўрталарида бўлиши керак.
Дунёдаги ҳар қандай ташаббус Украинани мустаҳкамласа, бу бутун дунё учун фойдалидир. Тушуниш керак бўлган энг муҳим нарса шуки, биз турли ташаббусларни илгари сурганимизда, уларнинг барчаси иккинчи, учинчи, тўртинчи қадамга ўхшайди. Биринчи қадам эса ҳимоя қилиш ва кучли бўлиб қолишдир”, — дея қўшимча қилди Украина президенти.
Парижда 26 февраль куни Европа расмийлари иштирокида Украинани қўллаб-қувватлаш бўйича йиғилиш бўлиб ўтди. Унда Франция президенти Эммануэл Макрон Украинага қўшинлар юбориш эҳтимолини инкор этмади. Бу маълумотни Словакия бош вазири Роберт Фико ҳам қўллаб-қувватлади.
Кремль бу ҳолатда “биз Россия ва НАТО ўртасидаги тўғридан тўғри тўқнашув эҳтимоли ҳақида эмас, балки муқаррарлиги ҳақида гапиришимиз керак” дея муносабат билдирди. НАТО бош котиби Йенс Столтенберг альянс Украинага ўз қўшинларини юборишни режалаштирмаётганини айтди.
Изоҳ (0)