Тошкентдаги мактабда дарс пайти ўқитувчи ва ўқувчи ўртасида жанжал юз бергани ҳақида хабар берилган эди. Ҳолат акс этган видео ижтимоий тармоқларда тарқалган.
Мактабгача ва мактаб таълими вазирлиги матбуот хизматининг хабар беришича, ҳолат бўйича вазирлик томонидан ўрнатилган тартибда ўрганиш ишлари, хусусан, ўқувчиларнинг ота-оналари, мактаб раҳбарияти вакиллари, ўқитувчилар ва ўқувчилар билан мулоқотлар ва зарур тушунтириш ишлари олиб борилди.
Юзага келган вазиятга тегишли ҳужжатлар ҳуқуқий баҳо бериш учун Болалар масалалари бўйича Чилонзор тумани комиссиясига тақдим этилди.
Комиссиянинг мазкур ҳолат бўйича ўрганиш хулосаси 28 февраль куни эълон қилиниши режалаштирилган.
Аввалроқ Чилонзор туман ҳокимлиги матбуот хизмати воқеа мактабнинг 6-синф ўқувчилари математика дарсида содир бўлгани ҳақида хабар берганди. Болалар ўқитувчи Ю.Портнованинг гапларига қулоқ солмаган ва тартибни бузган. Ўз навбатида ўқитувчи ҳам жаҳлини жиловлай олмасдан ўқувчини мажбурлаб синфдан чиқариб юборган. Бола синфдан чиқмаслик учун ўқитувчига қаршилик кўрсатган.
Мактабда юз берган бу воқеа юзасидан ота-оналар мажлиси чақирилди ва уларнинг хоҳишига кўра математика ўқитувчиси Ю.Портнова мазкур синф ўқувчиларига дарс ўтишдан четлаштирилди.
Изоҳ (0)