Ўзбекистонда 2 миллион киловатт/соат электр энергияга тенг “яшил энергия” сертификатлари топширилди. Бу ҳақда “Дарё”га “Ўзбекгидроэнерго” АЖ ахборот хизмати раҳбари Равшан Бойқулов маълум қилди.
Хабарингиз бор, мамлакатимизда қарийб 30 йилдан буён фаолият юритиб келаётган BAT Узбекистан АЖ қўшма корхонаси биржа савдолари орқали “Ўзбекгидроэнерго” АЖнинг 2000 дона “яшил энергия” сертификатларини харид қилган эди. Самарқанд шаҳрида BAT Узбекистан компанияси раҳбариятига Ўзбекистондаги биринчи “яшил энергия” сертификатлари расман топширилди. 2000 дона яшил энергия сертификатини харид қилган компания ўз маҳсулотларини ишлаб чиқариш учун жорий йилнинг январь ва февраль ойларида ишлатган электр энергиясининг 100 фоиз қайта тикланувчи энергия манбаларидан ишлаб чиқарилганини тасдиқлайди, — дейди тадбир ҳақида хабар берган масъул.
Таъкидланишича, тадбир давомида жамиятда олиб борилаётган трансформация жараёнлари, барқарор ривожланиш бўйича эришилган ютуқлар ҳамда қайта тикланувчи энергия манбалари ҳажмини ошириш йўналишида амалга оширилаётган истиқболли лойиҳалар тўғрисида фикр алмашилган. Компания вакиллари томонидан барқарор ривожланиш, ижтимоий, экологик йўналишларда эришилган ютуқлар бўйича тақдимот қилинган.
Президентнинг 2023 йил 12 майдаги “Яшил энергия сертификатлари тизимини жорий этиш чора-тадбирлари тўғрисида”ги қарорига мувофиқ, 2023 йил 1 июлдан бошлаб “Ўзбекгидроэнерго” АЖ тизимидаги гидроэлектр станцияларида ишлаб чиқарилган электр энергияси учун “яшил энергия” сертификатлари тизими жорий этилди.
Жорий ҳисоб-китобларга кўра, “Ўзбекгидроэнерго” АЖ тасарруфида 53 та ГЕС мавжуд бўлиб, умумий гидроэнергетик қуввати 2 225 МВтга тенг. ГЕСларда ишлаб чиқариладиган электр энергия ҳажмидан келиб чиққан ҳолда, жамият томонидан йилига 7 миллион дона “яшил энергия” сертификатлари биржа савдога чиқарилиши ҳамда талабгорларга тақдим қилиш имконияти мавжуд. Бир дона “яшил энергия” сертификати қайта тикланувчи энергия манбаларидан фойдаланган ҳолда 1000 киловатт соат электр энергияси ишлаб чиқарилганини тасдиқлайди.
2030 йилга бориб иқтисодиётда энергия самарадорлиги 2 карра оширилиб, қарийб 50 миллиард киловатт/соат “яшил энергия” ишлаб чиқарилади. 10 минг километр магистрал ва 110 минг километр ҳудудий электр тармоқлари барпо этилади.
Изоҳ (0)