Россиялик ҳарбий блогер Андрей Морозов Россия Украинанинг Авдеевка шаҳрига ҳужуми чоғида катта йўқотишларга учрагани ҳақида хабар берганидан бир неча кун ўтиб вафот этди. Бу ҳақда CNN нашри хабар берди.
Маҳаллий Россия нашрлари берган маълумотга кўра, блогер ўз жонига қасд қилган. Полиция ўлим тафсилотларини ўрганаётгани маълум қилинган.
Аввалроқ блогер Морозов октябрь ойидаги ҳужумдан бери Москва 16 мингга яқин аскар ва 300 та зирҳли техникасини йўқотганини айтган эди. Бу эса россиялик тарғиботчиларнинг қаттиқ танқидига учраган.
Блогер ўз жонига қасд қилиш ниятини олдиндан эълон қилиб, кузатувчиларини унинг учун мотам тутмасликка чақирган. Вафотидан сўнг Луганскка дафн қилишларини сўраган.
Хабарда айтилишича, Морозов Авдеевка ҳақидаги хабарни эълон қилгач, номаълум ҳарбий унга қўнғироқ қилиб, постни ўчиришни буюрган. Блогернинг Россия армиясида қурол-яроғ етишмаслиги муаммоси борлиги ҳақидаги постлари Кремлда ташвиш уйғотгани айтилган.
Изоҳ (0)