Тошкент вилояти Экология бошқармаси ходимлари томонидан ноқонуний балиқ овланишининг олдини олиш мақсадида навбатдаги тунги рейд тадбири ўтказилди. Бу ҳақда Экология вазирлиги матбуот хизмати хабар берди.
Маълум қилинишича, Қуйи Чирчиқ тумани “Қўрғонча” МФЙ ҳудудидаги рейд давомида Чирчиқ дарёсининг чап қирғоғида маҳаллий фуқаролар Ш.А. ва А.И. томонидан ноқонуний усулда, яъни электр қармоқ ёрдамида балиқ овланаётгани аниқланган.
Ушбу шахсларга тегишли нарсалар кўздан кечирилганда 1 дона электр қармоқ, 1 дона резина қайиқ, 1 дона аккумулятор ва 86 бош ҳар хил турдаги балиқ (шундан 80 бош товон балиғи, 2 бош зоғора балиғи, 4 бош оқ балиғи) ҳамда 1 дона ондатра (мушк каламуш) борлиги маълум бўлган.
Ҳолат натижасида Ҳайвонот дунёсини муҳофаза қилиш ва ундан фойдаланиш тўғрисидаги қонуннинг 34-(балиқ овлаш) ва 35-моддалари (балиқ овлашни амалга ошириш шартлари) бузилган. Табиатга эса 28 миллион 628 минг сўм зарар етказилган.
Ҳуқуқбузарларга нисбатан МЖтКнинг 90-моддаси 4-қисмига (ов қилиш ва балиқ овлаш қоидаларини, шунингдек ҳайвонот дунёсидан фойдаланишнинг бошқа турларини амалга ошириш қоидаларини бузиш) асосан маъмурий баённома расмийлаштирилди. Ҳужжатлар тегишли тартибда судга юбориш учун тайёрланмоқда.
Изоҳ (0)