Дунёдаги энг машҳур сайёҳлик йўналишларидан бири бўлган Италия пойтахти Рим 2023 йилда Европанинг энг хавфли шаҳри деб топилди.
Европа Иттифоқининг 2023 йил учун Европа шаҳарларидаги ҳаёт сифати бўйича ҳисоботига кўра, сўровда қатнашганларнинг атиги 38 фоизи Рим кўчаларида тунда юриш хавфсиз эканлигига рози бўлган. Антирейтингда иккинчи ўринни Греция пойтахти Афина (40 фоиз), учинчи ўринни Франциянинг порт шаҳри Марсель (43 фоиз) эгаллади.
Шу билан бирга, Дания пойтахти Копенгаген, Испаниянинг Оведо шаҳри ва Словения пойтахти Любляна Европадаги энг хавфсиз деб топилди — уларнинг барчаси 87% дан овоз олишди.
Ҳисобот шуни кўрсатадики, кичикроқ шаҳарларда кўпроқ одамлар ўзларини хавфсиз ҳис қилишади, ўртача ҳар ўнтадан еттитаси. Аҳолиси 250 минг кишидан кам бўлган шаҳарларда аҳолининг 75 фоизи ўзини хавфсиз ҳис қилади, аҳолиси 1 миллиондан 5 миллионгача бўлган шаҳарларда бу кўрсаткич 67 фоизга тенг.
Аёллар эркакларга қараганда Европа шаҳарларида ўзларини камроқ хавфсиз ҳис қиладилар (67% эркаклар ва 72% аёллар), 55 ва ундан катта ёшдаги аҳоли ва ишсизлар эса шаҳарларни хавфли деб билишади.
Ҳисоботга кўра таълим даражаси хавфсизлик ҳақидаги тасаввурга ижобий таъсир кўрсатиши ҳам аниқланган. Масалан, коллеж маълумотига эга бўлган аҳолининг 71 фоизи тунда шаҳарда ўзларини хавфсиз ҳис қилишларини айтишган, бошланғич маълумотга эга бўлганларнинг эса 67 фоизи ўзларини хавфсиз ҳис қилишларини маълум қилишган.
Изоҳ (0)