“Соғлиқни сақлаш соҳасида ислоҳотларни чуқурлаштириш бўйича қўшимча чора-тадбирлар тўғрисида”ги президент қарори қабул қилингани тўғрисида хабар берилганди. Ҳужжатга мувофиқ тиббиёт ОТМларининг 200 нафар битирувчиси етакчи хорижий ОТМларда ўқитилади.
Қарорга кўра, 2024/2025-ўқув йилидан:
- тиббиёт ОТМларининг 200 нафар битирувчиси магистратура ва клиник ординатура дастурлари асосида етакчи хорижий ОТМлар ва марказларда ўқитилади;
- тиббиёт ОТМларининг битирувчи курс талабаларида оилавий шифокор учун талаб этиладиган клиник кўникмаларни шакллантириш мақсадида кўп тармоқли тиббиёт ташкилотларида иш ҳақи тўланадиган интернатура ташкил этилади;
- Тошкент тиббиёт академиясининг таълим дастурлари халқаро аккредитациядан ўтказилади;
- тиббиёт йўналишидаги ОТМ талабаларининг билимлари икки босқичли баҳолаш тизими асосида баҳоланади.
Қуйидаги магистрлик йўналишлари жорий этилади ҳамда ҳар йили камида 150 нафар мутахассисларни давлат буюртмаси асосида тайёрлаш чоралари кўрилади:
- “Жамоат саломатлигини ташкил этиш ва бошқариш” (Public Health and Healthcare Management);
- “Жамоат саломатлиги: эпидемиология ва маълумотлар таҳлили” (Public Health: Epidemiology and data science/data analytics);
- “Жамоат саломатлиги: овқатланиш” (Public Health: Nutrition);
- “Профилактик тиббиёт” (Preventive Medicine);
- “Жисмоний фаоллик ва реабилитация” (Physical Activity and Rehabilitation).
Шавкат Мирзиёев 22 январь куни соғлиқни сақлаш соҳасидаги ислоҳотларни жадаллаштириш бўйича таклифлар тақдимоти билан танишганди. Шунда Тошкент тиббиёт академиясининг таълим дастурлари халқаро аккредитациядан ўтказилиши, унда жамоат саломатлиги, профилактик тиббиёт, жисмоний фаоллик ихтисосликлари бўйича магистрлик йўналишлари очилиши тўғрисида айтилган эди.
Изоҳ (0)