Ўзбекистонда дам олиш куни очиқ ва қуёшли об-ҳаво бўлиши кутилмоқда

Ўзбекистон ҳудудига 19 январь куни нам ва нисбатан совуқ ҳаво массалари кириб келиши кутилмоқда, деб хабар берди “Ўзгидромет”.

Республика ҳудудининг катта қисмида ёғингарчилик кутилмайди, фақат шарқий ҳудудларнинг баъзи жойларида ёғингарчилик (ёмғир, қор) бўлади. Ҳаво ҳарорати кундузи 5-10 даража илиқдан, шимолда 3 даража совуқ-2 даража илиқдан юқори бўлмайди.

20 январь, шанба куни фақат Фарғона водийси вилоятларида кечаси ва эрталаб ёмғир ва қор кўринишидаги ёғингарчилик сақланиб туради. Ўзбекистоннинг қолган ҳудудларида ёғингарчиликсиз об-ҳаво кузатилади. Кўпчилик ҳудудларда ҳаво ҳарорати кечаси 0-5 даражагача пасаяди, кундузи 3-8 даража илиқни, шимолда кечаси 8-13 даража совуқни, кундузи 0-5 даража илиқни ташкил этади.

21 январь, якшанба куни Ўзбекистонда очиқ ва қуёшли об-ҳаво бўлиши кутилмоқда. Ҳарорат кечаси 0-5 даража совуқ атрофида бўлиши сақланиб туради, кундузи 7-10 даража илиққача кўтарилади, республика шимолида кечаси 5-10 даражагача, кундузи 2-7 даражагача бўлади.

20—21 январда шимолда ва чўл ҳудудларда баъзи жойларда шамол тезлиги 13-18 метр/секундгача кучайиши мумкин. Тошкент ва Наманган вилоятлари тоғли ҳудудларида ушбу кунларда қор кўчиши хавфи бор.

Тошкентда дам олиш кунлари ёғингарчилик кутилмайди, кечаси ва эрталаб туман тушиши мумкин. Кечаси ҳаво ҳарорати 1-3 даражагача совуқ, кундузи 4-7 даража илиқ атрофида бўлади.