АҚШ разведкаси Украина ҳудудидаги жанглар камида яна икки йил давом этади, деб ҳисобламоқда. Бу ҳақда CNN хабар берди.
CNN маълумотларига кўра, баъзи Америка ва Ғарб расмийлари можаро беш йилга чўзилиши мумкинлигини ҳам тахмин қилмоқда.
Телеканал Украина бу йил мудофаа саноатини мустаҳкамлайди ва 2025 йилда Россиядан кенг кўламли кучайишни кутган ҳолда қуролли кучларини қайта қуради, деб ҳисоблаётган америкалик амалдорнинг фикрини келтириб ўтди.
“Шунинг учун Ғарбнинг доимий қўллаб-қувватлаши жуда муҳим, чунки Украина учун келгуси йилда келажагини белгилаб берадиган муҳим воқеалар содир бўлиши мумкин”, деди манба CNN телеканалига.
Европада жойлашган америкалик ҳарбий амалдорнинг телеканалга айтишича, Украина камида икки йил ичида Россия қўшинларини Запорожье вилоятидаги Мелитополдан ҳайдаб чиқариш учун иккинчи йирик қарши ҳужумга уриниши мумкин. CNN телеканалига интервью берган америкалик ва Ғарб расмийлари бу йил ҳар икки томоннинг сезиларли муваффақиятга эришишини кутмаяпти.
28 декабрь куни Япониянинг Nikkei газетаси эълон қилган материалда, Россия президенти Владимир Путин 2023 йил 20 март куни бўлиб ўтган учрашув чоғида ХХР раиси Си Сзинпинга Россия Федерацияси Украинада беш йил давомида ҳарбий операция ўтказишини айтгани маълум қилинганди.
Украина президенти Владимир Зеленский апрель ойида Финляндиянинг Ylе нашрига берган интервьюсида можаро йиллар ва ҳатто ўнлаб йиллар давом этиши мумкинлигини тан олган.
Изоҳ (0)