Қирғизистон Миллий хавфсизлик давлат қўмитаси 11 январь куни мамлакатда давлат тўнтарилишининг олди олинганини маълум қилди. Бу ҳақда “АКИпресс” хабар берди.
Маълум қилинишича, тадбиркор Имомидин Ташов ва фаол Тилекмат Куреновнинг ўнлаб шериклари ҳибсга олиниб, уларнинг республикада ҳукуматни ағдариш ниятлари тасдиқланган. Улар тергов изоляторида телефон орқали оммавий тартибсизликлар уюштиришни режалаштирган. Миллий хавфсизлик давлат қўмитаси қўлга олинганларни сўроқ қилган, улар кўрсатма берган.
“Жумладан, Имомидин Ташов томонидан тайёргарлик ва ташкилий тадбирларни молиялаштириш бўйича маълумотлар олинди”, — дейди Миллий хавфсизлик давлат қўмитаси.
Мазкур ҳолат юзасидан Жиноят кодексининг 326-моддаси 1-қисми ва 245-моддаси — ҳокимиятни зўрлик билан эгаллаб олиш, тижорат ёки бошқа ташкилотлар ходимларининг ваколатларини суиистеъмол қилиш бўйича жиноят иши қўзғатилган. Ташов ва Куренов терговдан яширинган, улар қидирувга берилган.
- Имомидин Ташов KG Group қурилиш компанияси ва KG Group жамоат фонди президенти. 2021 йилда у Қирғизистон президенти лавозимига кўрсатилган ва 16383 нафар овоз олган, бу 1,17 фоизни ташкил этади.
- У 2023 йил октябрь ойида қўлга олиниб, унга нисбатан турар жой биноларини ноқонуний қуриш айби билан жиноят иши қўзғатилган. Ташов Бишкек Марказий ички ишлар бошқармасининг вақтинчалик ҳибсхонасига жойлаштирилганди.
- Тилекмат Куренов жамоат фаоли. У Кампирбоднинг Ўзбекистонга берилишига қарши бўлган ва сув омборини муҳофаза қилиш қўмитаси таркибига кирган.
Изоҳ (0)