Эроннинг Қум шаҳридаги “Жамкарон” масжиди тепасида қизил байроқ кўтарилди. Бу ҳақда Эроннинг Fars агентлиги маълум қилди.
Керман шаҳридаги терактдан сўнг масжид гумбазида қизил байроқ пайдо бўлган, худди шу байроқ 2020 йилда Эрон Ислом инқилоби қўриқчилари корпуси генерали Қосим Сулаймоний ўлимидан кейин кўтарилган эди.
Американинг CNBC телеканали 2020 йилда таъкидлаганидек, шиа анъаналаридаги қизил байроқлар ноҳақ тўкилган қонни ҳам, ўлдирилган одам учун қасос олишга чақириқни ҳам англатади.
3 январь, чоршанба куни Эрон жануби-шарқидаги Керман шаҳрида Сулаймоний вафотининг тўрт йиллиги хотирасига мотам маросимлари чоғида портлашлар содир бўлди. IRNA агентлиги маълумотларига кўра, оқибатда 89 киши ҳалок бўлган, улардан 12 нафари 15 ёшгача бўлган болалардир. Ҳаммаси бўлиб 284 киши жароҳатланган.
Эрон ҳукумати 4 январни ҳалок бўлганлар учун миллий мотам куни деб эълон қилди, мамлакат президенти Иброҳим Раисий эса теракт ташкилотчилари ва айбдорлари аниқланиб, жазоланишини айтди. Шу билан бирга, Раисий портлашлар учун Исроил ва АҚШни айблади, улар эса воқеага алоқадор эмаслигини даъво қилди.
Кейинроқ “Исломий давлат” террорчилик гуруҳи Кермандаги иккита портлаш учун жавобгарликни ўз зиммасига олди. Террорчиларга яқин Telegram каналларида эълон қилинган баёнотда ИШИДнинг икки аъзоси оломон орасида ўзини портлатиб юборган.
Изоҳ (0)