Чеченистон раҳбари Рамзан Қодиров Ички ишлар вазирлиги ва Миллий гвардия қўмондонлари ва бўлинмалари бошлиқлари билан учрашувда жиноятчиларнинг қариндошларини жазолашга чақирди. Бу ҳақда Meduza хабар берди.
Қодиров ўтказган тегишли йиғилиш унинг Telegram каналида эълон қилинди. Видео остига у “ҳуқуқ-тартибот идоралари ходимларини ўта ҳушёр бўлишга ва тартибсизлик белгиларини бостиришга чақиргани” ёзилган.
“Инсон ҳаётига ҳужум қилишга ҳар қандай уриниш жиноятчининг яқинларига ҳам таъсир қилади. Яқин қариндошлар ўз оиласи вакили нима қилишини билиши ва унинг учун масъулиятни ўз зиммасига олиши керак, буни чечен одатлари асрлар давомида бизга ўргатиб келади”, — дейилади хабарда.
Шу билан бирга, Чеченистон расмийларига мухолиф бўлган 1АDАТ Telegram канали видеонинг ўзида чечен тилида гапирган Қодиров аниқроқ гапирганини пайқаган. Хусусан, у қотилликни содир этганларнинг яқинларини ўлдириш эҳтимолига шаъма қилган.
“Агар бирон-бир ходим заррача хавфни сезса ёки уни шунчаки тасаввур қилса, дарҳол унга эътибор қаратиши керак. Унинг кимлиги ва кимнинг фарзанди эканлиги муҳим эмас. Агар кимдир жамоат хавфсизлигига, ходимга ёки сайёҳга тажовуз қилса ва жиноятчини топмасак ҳам, уни қидиришда давом этмаймиз, балки унинг қариндошини топамиз.
Қадимдан одат бўлганидек, қариндошларидан бири жиноят содир этиб, жиноятчи топилмаса, унинг укаси, отаси ўлдирилган. Шунинг учун биз қонли адоватимизни тезда қоплаймиз”, — деб таржима қилган канал Қодировнинг баёнотини.
Чеченистон раҳбари, шунингдек, оиланинг жиноят содир этган қариндошидан воз кечиши уларни қасос олишдан озод қилмаслигини қўшимча қилди.
“Акс ҳолда одам бировни ўлдириб, жазосиз кетиб қолади. Қариндошлари эса уни ташлаб кета бошлайди”, — деган Қодиров.
Изоҳ (0)