Кўплаб образлари билан томошабинларга яхши таниш бўлган актёр Чоу Юнь Фат мультимиллионер ҳисобланади. Кўринишидан, у зодагонлардек бўлиши, хотини эса дунёдаги энг яхши тақинчоқларни тақиши керак. Ахир, Голливуддаги муваффақиятли карьераси актёрга катта гонорар олишга имкон беради. Бироқ машҳурнинг суюкли аёли Жасмин Таннинг сўзларига кўра, эри шахсий эҳтиёжлари учун ойига юз доллардан кўп пул сарфламайди.
Нега 700 миллион долларлик бойлик эгаси бунчалик тежамкор? Жуфтлик ўз олдига қандай мақсад қўйган? Чоу Юнь Фат иштирокидаги “Анна ва қирол”, “Олтин гулнинг лаънати”, “Кариб денгизи қароқчилари” ва бошқа бир қатор машҳур Голливуд фильмлари ёдингизда бўлса керак. Томошабинлар хитойлик актёрни мафия вакили, император, зодагон ёки қадимги мутафаккир Конфуций каби энг ажойиб образлари билан танийди.
Унинг кино қаҳрамонлари олтин иплар, марварид ва олмослар билан безатилган қимматбаҳо кийимларда кўриниш беради. Эгнидаги ипак либослари қимматбаҳо тошлар билан безатилган бўлади. Актёрнинг бошини эса соф олтиндан ясалган ҳукмдорлик тожи безайди.
Олтиндан қилинган бош кийимларда тасвирланган илонлар ва афсонавий аждарлар, шарқона гуллар ва қудрат тимсоллари Чоу Юнь Фатнинг қаҳрамонларига улуғворлик ва салобат бағишлайди. Томошабинни эса қадимги даврларга олиб кетади.
Соф олтиндан ясалган тароқ ёки соч тўғноғичда оловли аждар тасвирланади — ҳақиқий билим, донолик ва империя қудрати рамзи. Олтин “илон-ой”, яъни аждаҳо Самовий империя халқининг тимсоли ҳисобланади.
Афтидан, Хитой императорларининг барча хазиналари Гонконг миллионерининг бошида ёки эгнида бўлган. Аммо, афсуски, бу шунчаки иллюзия. Ҳаётда актёр камтарлик, тежамкорликни ёқтиради ва энг оддий нарсаларни афзал кўради. Ижодкорнинг рафиқаси ҳам бой зодагон аёлга ўхшамайди. Гарчи у нафис кийиниб, замонавий тақинчоқларни тақса ҳам оддий аёллиги билиниб туради.
Қизил гилам учун Жасмин Тан ҳашаматли тошлардан кўра дизайнерлар ижодидан бўлган заргарлик буюмларини танлайди. Геометрик шаклларга ўхшаш замонавий кумуш маржонлар ва катта билагузуклар хитойлик аёлнинг қора либослари билан жуда мос келади.
Оқ ва олтин марварид мунчоқлар билан безатилган сон-саноқсиз маржонда эса янада улуғвор кўринади. Аммо диққат қилсангиз, аёлда жаҳон заргарлик брендларининг зумрадлари, сафирлари ёки олмослари йўқ. Кўпинча заргарлик буюмлари тўпламида оддий сирғалар ҳам бўлмайди. Вақти-вақти билан уни деярли кўзга ташланмайдиган маржон ва сирғаларда кўриш мумкин.
Фарзандсизлигига қарамай, 36 йиллик жуфтлик бахтли ва ҳозиргача бир-бирини ардоқлайди. Улар ўзини муҳтожларга хизмат қилиш ва ёрдам беришга бағишлашга қарор қилган. Хайрия улар учун ҳаёт тарзига айланган. Актёр топган миллионларини шахсий мулк деб ҳисобламайди.
У ўзини вақтинчалик пул сақловчидек ҳис қилади ва ердаги саёҳати тугагач, ўзининг хоҳишига кўра, пуллари қашшоқликда яшаётганларнинг эҳтиёжларига сарфланади. У анчадан бери кўплаб хайрия лойиҳаларида иштирок этмоқда. Актёр қашшоқлик нима эканлигини жуда яхши билади. У Гонконг яқинидаги кичик бир қишлоқда ўсган, оиласи доимий равишда пулга муҳтож бўлган. У ҳам, бошқа болалар ҳам оёқ кийими йўқлиги учун кўпинча ялангоёқ юрган.
Чоу Юнь Фат 17 ёшидан бошлаб ота-онасига ёрдам бериш учун ҳар қандай оғир меҳнатга ўзини уради. Газетада қандайдир телесериалларга кастинг ўтказилаётгани ҳақидаги эълонни кўрмагунича идиш ювади, хизматкорлик қилади ва кўча супуради. Омадини синаб кўриш учун кастингга борган йигитчанинг бахти кулади. Ёш истеъдод соҳибининг илк кинолари Осиё жангари фильмлари эди. 90 йиллардан бошлаб у Голливуд фильмларида роль ўйнайди ва машҳур осиёлик актёрга айланади. Ўшандан кейин гонорари ҳам ошиб бораверади.
Аммо у одатларини ўзгартирмади ва оддийликка содиқ қолди. Актёр шахсий самолётлар, қимматбаҳо машиналар ёки тилла соатларга миллионлаб пул сарфламайди. У метрода юради ва оддий жойларда овқатланади. Оломон орасида уни таниб қолишса, ўз хоҳиши билан автограф қўйиб беради. У оддий кийим кияди, лекин очкўзлик, зиқналик сабабидан эмас, балки шу унга қулай бўлгани учун. Умуман олганда, актёр чегирмали дўконлардан кийинади. Олтин узуклар, олмос соатлар ёки қимматбаҳо автомобилларга умуман қизиқмайди.
Изоҳ (0)